Pu Victor Biak Lian (CHRO) le Peter Thawnghmung (CCI) - Hmanthlak: Lal Mi Sak Sawmhal

Travel diary: Kuala Lumpur, 15 February, 2019

Ralzam hna kong ceihkhan ding ah an ka sawm ve ca ah KL ka rak tlawng. Thla 6 chung lohma zohthannak le hihnu thla 6 chung ah zeidah kan tuah khawh ti khi a si. A tlam a tling ngai tiah ka ruah.

A rauh hlan ah UN nih an ralzam dihternak policy an ruahthan khawh men tiah kan ruah. Sihmanhsehlaw, hmailei kong tu ah cun Pathian nawl si ko seh! Minung lei tuahkhawh vial cu thla 6 chung ah Geneva ah siseh, London ah siseh, Delhi, Cambarra, BKK le KL hna ah chimtawk cu chim a si cang. Kan ram le chiatlei a panh chin mi a lo hoi! Thatlei dahrah kan panh kan ti ah hnulei ah aa mer than mi kan lo.

KL cu CND hawi hlan ah an tuah. Mi an thahnem ngai. Hall khan aa manh lo ca ah tuan ah kan tuahnak a si tiah tuanvo ngei nih an kan chimh. CNF, CNLD le CHRO upa sawm an si. An biachim a tha. Lung a hmui ngai. Riantuan ni bel ah tuah a si tik ah mi an tlawm deuh kumdang nak cun.

Malaysia MP pakhat nih bia a chim mi cu refugee hi kan ca ah hnahnawk in ruahlo in santlai mi an si ti hi ka pom i cu cu biatak in parliament ah ka chim lai a ti. Malaysia Barr Council upa pakhat zong nih thazang peknak bia upadi lei hoih in a chim i uar a um taktak. Hawitha kan ngeih hna hi a sunglawi tuk!

2019 Malaysia Chin Miphun Ni ah minung 1,000 hrawng an chuak kho – Hmanthlatu: Lal Mi Sak Sawmhal

Tutan ah thilmak ngai ka ton mi cu 1976 ah Falam ah hin tang 6 ka rak kai i cu lio ah ka siangin kai tti mi Peter Lal Sui Thawng Hmung he kan i tong. Chin Community Indianapolis an hotu a si. CCI cu kutput $5000 he an rak ra. Kaa lawng in refugee va tlawn cu tiah fund kan raise i ICC (Independent Chin Communities – Chin ralzaam bu 5 fonhnak bu) caah ti in $5000 he an ra a ti. Cu lungthin cu ka uar tak tak. Kum 43 hnu ah kan i hmu na in, kan hngakchiat mui te hi kan u pat tiang kan i than pi ko. A sunglawi ka ti. Pathian dawtnak!

KL ka tlawnchel ah cun hngakchia te te ka hmuh hna ah hin ka lung a tha kho lo ee. Hi hngakchia hna hi an mah te cun ca an chimh len ve ko hna na in, fornal education siangin ah hin cawn an herh. Cu chance te cu a um ve lo hi ka ah hin.

Happy Chin National Day!

Victor Biak Lian
Camp/ KL

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.