U.S. nih Ralzaam 30,000 Lawng Lak Aa Tim

U.S. Secretary of State (Ramleng Vuanci) Mike Pompeo nih cozah kum 2019 chungah US nih vawleicung ralzaam 30,000 kan lak lai tiah a chim.

President Trump nih nawl (presidential determination) a chuah rih lo. Nain, Secretary Pompeo a chim ningin atu thla dih lei asiloah October zarhkhatnak hrawngah nawl a chuah te kho men. Zeicahtiah cozah kum 2019 cu October 1 2018 in a thawk i, September 30 2019 tiang a si.

President Trumph nih 2018 kum ah 45,000 ralzaam lak dingin nawl a rak chuah. Nain, hi a minsen a thut i ka tuah lai a tining in a tuah lo. September 14 tiangah U.S. ah a lut taktakmi ralzaam hna cu 20,824 lawnglawng an si. A cheu hmanh a lak lo.

Cun, East Asia in 5,000 lak ding a ti. 3,419 lawng an phan rih. September 30 cu kum dongh a si caah zarhhnih chungah tam an lut manh ti lai lo.

Cucaah President Trump nih 30,000 lak dingin minsen a thut taktak ahcun Malaysia le India i Chin ralzaam caah ruahchan awk a tlawm chin lengmang cang.

U.S. president thimnak an tuah lioah President Trump a sung lai, ka rak ti. Ka palh. Nain, ralzaam kong he pehtlaih in a kalpi te lai tiah ka rak ruahmi policy belte cu ka palh lo. Ka rak ruahning tein atutiang cu a kal pi ko rih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.