Saya Samuel Lian

Henrico, US – Chin tlangval Samuel Lian cu a ngakchiat lio ah Myanmar ram in US ah ralzaam dirhmun in a rak phan.

Kum 16 a si ah Henrico High School ah sianginn kai aa rak thok.

Mirang holh a rak thiam tuk rih lo caah aa rak harh ngai, nain “tinchia hi ka rak duh tukmi sikaw, ka sianginn kai hawi he i pehtlaihnak caah ka rak hman. Mirang holh tlawmpal te cu ka rak thiam nain tampi ka rak thiam lo,” tiah Samuel Lian nih a chim.

Tinchia a rak cawnka ahcun a hramdomh tein aa rak thok nain thiam aa fawih tuk.

High School a dih in Virginia Commonwealth University (VCU) ah a peh i electrical engineering le applied mathematics in degree pahnih a ngah. Minor in physics zong a rak cawn chih.

Atu cu Henrico High School ah a rung kir i; aa rak thoknak hmun te ah ca a chim.

“Tinchia hi kan i lak ning aa dang cio. Micheu nih cun rang tein an thiam men lai, nain micheu nih cun holh thiam lo ruang le tinchia a har deuh ruangah caan sau deuh an i rauh ve,” tiah Samuel Lian nih a chim.

Samuel Lian cu cachimh rian he aa tlak tuk, tiah Henrico Siangsangrun sayamakyi nih a chim.

“Samuel Lian cu kan cachimtu hna lakah a thiambik pakhat ah aa tel ve,” tiah sayamakyi Karin Castillo-Rose nih a chim.

“Thil sining he aa tlak ningin a um thiam. A siangngakchia pawl sining a theihthiam, anmah he chawnhbiak zia a thiam i an upat tuk,” a ti.

“A nuamh tuk bantukin thluak re a thei pah ve. Aruang cu tinchia hramdomh cawn kha zei dah a rak lawh ti ka hngalh. Hramdomh thiam kha tthanchonak a si,” tiah Samuel Lian nih a chim.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.