Ram Tinthei: Caan Karlak Thimnak Le Chin Party
Matupi peng ah aa chuh ding Salai Aung Lian (CPP) le Kanpetlet peng ah CNDP nih vote sawmnak a tuah lio

Thaizing kip November 3, 2018 in Kawlram chung i caankarlak thimnak (by election) thok asi cang lai. Kanmah Chin ram chung hmun 2; Matupi le Kanpetlet ah thimnak a um ve lai.

Kawl party asimi USDP in lucem U Than Htay le NLD in Lucem Daw Aung San Su Kyi tiang Thlanglei Laitlang ah an va kal i mipi lemsoinak an va tuah. Chin party lei zong an si khawh tawk in an izuam cuahmah liopi asi ve.

2008 phunghrampi cu Hlutdaw chungin thlen khawhlo dingin Ralkap nih rak hren chihmi asi caah Rampi Daihnak le Ramkhel Biaruahnak (Peace Process & Political Dialogue) lawngin remh khawh ding asi. Mah cucu lawng cu lam kan ngeihmi asi caah rammi kip nih a biapituk ah an chiah cio i, vawlecung ramkip zong nih tha an pekmi asi. Cu ramkhel biaruahnak ahcun 2015 rampi thimnak i teinak a hmumi party lawng itel khawh asi.

Kan Chin ramkhel party pawl teinak an hmuhlo caah ramkhel biaruahnak ah kumpi kum 3 chung an itel kho ti lo. Puai a zohtu minung menmen ah an cang i, an aw aan zei ah relpiak an si tilo.

Chin party nan tamtuk caah thimfung aa then, mipi nih zeidah pek awk kan in hngal hnalo ti asi caah, Chin miphun hna nih forhfialnak le tanpinak thawngin Chin party ngan pathum CLD, CPP le CNDP hna cu CNLD tiin September thla, 2018 chungah ifonh asi cang.

Tutan caankarlak thimnak ahhin NLD leiin “Chin party nih teinak hmuh a haulo, CNF an itel i ramkel biaruahnak ah Chin aiawh in bia an chim ko tung” tiin mipi lemsoinak an tuah. Hi ramlhel biaruahnak ahhin Stakeholders phu 3 in an um i; Cozah le ralkap phu, tlangcungmi hriamtlai phu, le ramkhel party phu tiin an si hna.

Kanmah Chinmi cu hramtlai lei CNF lawngin itel asi caah Chin Party nih tutan thimnak teinak an hmuh ding a biapit zia CNF leiin Dr. Sui Khar nih Chin World Media sin zongah a chim. Chin miphun caah nunnak thap in hriam a tlai cuahmahmi CNF hrimhrim nih Chin party teinak an hmuh hi a duhmi asi ti hngalh khawh asi.

2015 lio ah kan hawi Tlangcungmi Shan le Rakhine hna cu an Ramkulh Cozah (State Government) tiang tlaih dingin an izuam i Cozah tlaitu NLD he an rak i er len lio ah, kanmah Chin Party cu thutnak pakhat hmanh hmuh loin hawi mithmai zoh in khua an sa. Miphun hme tete asimi hna; Ta’ang, Wa, Kokang, Lisu, Lahu, Tai Leng, le PaO te pawl tiang nih teinak an hmuh i, an miphun aiawh in bia an chim kho.

Chin aiawh in Hlutdaw ah biachimtu kan ngeihlo le ramkhel biaruahnak ah kan itel khawhlo tik ah kan miphun sining hawi miphun dang hna sianh mithmai a bit ziahngakchia upa thlulo in kan hmuh dihmi asi. Miphun sinak identity a humzualtu le a dirhkamhtu hi cu Miphun party hi asi ko. Kan miphun kongkau he pehtlai in pakhatkhat kan ton caan ah miphun party a cawlcangh ahhin hmual a ngei hlei khunmi asi. Tahchunhnak ah ; Malaysia le India i Chin ralzam kong le Paletwah i raldohnak kong hna ah kan ifiang cem lai.

Cu caah tutan caankarlak thimnak hi Chin miphun hna kan caah a biapituk hringhran mi asi caah a lamkip in kan tuanrual a herh fawn. Tutan tal cu Chin miphun kan ithangh than, kamlo kan si zia le kan saduhthah a tlin than caan si hram ko seh.

Cattialtu: Ram Tinthei (Australia)

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.