Ramkip Chin Hruaitu Upa Sin Cakuat
Elaisa Vahnie le UNHCR Malaysia Lutlai Richard Towle an rak i ton lio - 2017

Dawtmi Chin unau hna,

Malaysia le India um Chin ralzaam kong he pehtlai in a biapi deuhmi tete kan theih cionak hnga, ramkip um Chin hruaitu le khrihfabu hruaitu dihlak sinah thawngthanh kan in duh hna.

• Malaysia le India ah Chin ralzaam 50,000 leng an um rih (ralzaam bu CRC, ACR, tbk. card aa tlaih nain UNHCR cazin ah aa tel lomi pawl rel chih in)

• 2010 in Myanmar ramkhel thlen aa thok hnu cun Malaysia cozah, UNHCR le ramdang bu pawl nih Chin ralzaam caah harnak a petu phungphai/policy an ser cio

• 2013 ah UNHCR le US nih P2 program an phih

• UNHCR nih ralzaam caah a hmunmi a phi a kawl tikah a tuah tawnmi phun 3;

  1. Mah lungtho tein kir a duhmi kirter
  2. Ram 2nk (Malaysia le India) ah umnak tuahpiak
  3. Ram thumnak kalter

• ‘2019 December 31 ah Chin ralzaam donghter ding’ in UNHCR nih 2018 June 13 ah thawng a thanh

• UNHCR thawngthanhmi ruangah, Chin ralzaam bu 5 komh ICC nih Kuala Lumpur ah August 13 in 15 tiang Chin Ralzaam Kong Khuakhannak meeting a tuah i ramchung ramleng in Chin upa pawl zong an kai – USA, Australia, Canada, Malaysia le Myanmar ram zongin meeting cu an rung kai cio. (ICC nih cathluan a chuah i ralzaam he aa pehtlaimi bu kip sinah a pek).

ICC meeting ah biachahnak rak ngeihmi cu;

  • UNHCR biachahmi doh ding le
  • Mah Lungtho Tein Kawlram Kir le Ram 2nk (Malaysia le India) ah um cu atu lio thil sining cuanh tikah a si kho lo, cucaah ram thumnak kal dingin Chin Ralzaam Kong Chimrelnak tuah si seh, ti a si.

Cun theihter kan in duhmi hna cu, American Baptist Churches Home Mission Society (ABC) nih ‘September 21 ah Washington DC ah ralzaam kong meeting kai ding’ in a kan sawm.

Meeting kai dingin Chin Refugee Advocacy i ruahnak petu Rev. Sa Tin Lal (CBANA), Rev Pau Kha Khai (Zomi Baptist Churches of America), le Coordinator General Pu Do Khan Khup kan vote hna i Pu Do Khan Khup thim a si – Chin Refugee Advocacy aiawh in Pu Do Khan Khup meeting a kaite lai.

A cunglei kan langhtermi Chin Ralzaam kong he aa pehtlaimi pawl hi ABC sin zongah kan pek. September 21 i Washington DC ah meeting nan tuah tikah an rak i put te lai.

Chin Refugee Advocacy bu nih US, Canada, Europe le New Zealand hna ah a ran khawh chung le hmual a ngeih khawh chungin Chin ralzaam kong chimrel kan pehzulh ttualmal rih lai.

Upatnak he,
Elaisa Vahnie
Advocacy Director
Chin Refugee Advocacy – USA

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.