Ramleng ah Chinmi 200,000 leng kan um

Chin state ah Chinmi 478,801 kan um. Myanmar ram khua zakip um Chinmi dihlak he fonh ahcun Kawlram chungah Chinmi ting 10 hrawng kan um.

Mah lio ahcun ramleng ah Chinmi 200,000 leng kan um ve. Ramleng um Chinmi ttha tein milu relnak a um lo caah a dikthlir in hngalh khawh a si lo i khrihfabu hruaitu le community upa pawl nih ‘a hrawnghrang’ an chimmi in tuak a si caah hi nakin tlawmte a tam/tlawm deuh kho.

US ram lawngah Chinmi 60,000 hrawng an um. Ralzaam dirhmun in Guam le Malaysia, India in a phanmi deuh lawngte an si.

India ram ah Chinmi 80,000 hrawng an um ve. Mah lakah ralzaam a sokmi 6,000 hrawng an si.

Malaysia ah 50,000 hrawng kan um, i Australia ram ah 10,000 hrawng kan um. Kan dihlak in ralzaam in a um/kalmi lawngte kan si.

A dang hna cu;

  • Norway – 2,200 hrawng – ralzaam
  • New Zealand – 2,000 hrawng – ralzaam
  • Canada – 1,800 hrawng – ralzaam
  • Denmark – 1,500 hrawng – ralzaam
  • Thailand – 700 hrawng – rianttuan
  • Sweden – 400 hrawng – ralzaam
  • Japan – 350 hrawng – rianttuan
  • South Korea – 300 hrawng – rianttuan
  • Czech Republic – 100 hrawng – ralzaam
  • Netherlands – 100 – ralzaam
  • Switzerland – 40 hrawng – ralzaam
  • Philippines – 100 hrawng – rianttuan le sianginn kai

Singapore, Germany, China, tbk. ram dangdang zongah rian a ttuan Chinmi an um len rih nain zeizat hrawng dah an si ti kan hngal lo.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.