Reuters — Myanmar le Bangladesh cozah nih Bangladesh phan Rohingya thong tampi Myanmar ah kirter an timh hna nain chungkhar 300 dengmang nih kir an duh lo caah an ṭul.

Ni kum November thla zongah kirter an rak timh hna nain Rohingya pawl nih duhlonak an langhter caah an ṭul.

Bangladesh le Myanmar nih “August 22 in Rohingya 3,450 kirter kan thok lai” tiah kan hnu zarh ah lungtlinnak an ngeihmi cu pakpalawng asi ṭhan ai.

2017 August ah Rohingya ralhrang nih Myanmar ralkap le palek an thah hna hnu ah Myanmar ralkap nih lehrulhnak a tuah i Rohingya mipi 750,000 leng Bangladesh ram ah an zaam. Mah chungah 3,450 cu Myanmar cozah nih kan hnu zarh ah lak dingin a fehter.

Bangladesh cozah rianttuan pakhat nih, “a kir ding Rohingya pawl ramri tiang phorhnak dingah bus le truck zong kan timh dih cang nain, UN rianttuan le Bangladesh cozah nih kan halmi Rohingya chungkhar 295 cu ‘kir na duh maw?’ tiin kan hal hna tikah ahohmanh nih an duh lo caah kan ṭul,” tiah a chim.

“Kan ngol taktak rih lo, Myanmar cozah nih lak dingin a fehter cangmi chungkhar dang zong kir an duh/lo kan hal rih hna lai i a duhmi cu kan kirter colh hna lai,” tiah a chimchap.

Myanmar Zatlang Zohkhenhnak Vuanci Zung lutlai Min Thein nih, “a hung kirmi um ai kun, va dong dingin zung rianttuan pawl cu ramri donnak hmun ah kan kuat hna,” tiah a chim.

Sinain, Rakhine state GAD zung lutlai Kyaw Swar Tun nih cun mah kong zeihmanh a chim duh lo, “chim awk zeihmanh ka ngei lo” ati.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.