Philippines president Duterte nih Bangladesh ram ummi Rohingya ralzaam pawl cu minung cung i zaangfahnak hmelchunh can ah keimah nih rammi sinak (citizen) ka pek hna lai tiah Nihnihni ahkhan a chim.

“Rohingya ralzaam pawl cu kan ram Philippines ah um dingin ka cohlan hna lai,” tiah president Dutertu nih League of Municipalities of the Philippines i meeting a kai hlan ah a chim.

Rohingya cu Myanmar cozah nih rammi sinak a pek duh hna lo caah ram ngeilo miphun an si.

Malaysia Ah Zaam Aa Timmi Rohingya 93 Myanmar Nih A Tlaih Hna

Bangladesh ram ahhin Rohingya ralzaam 700,000 leng an um i Bangladesh cozah ca ah thilrit ngai an si caah Myanmar ram ah kuat hram a thok cang hna.

Cheukhat cu Myanmar ram kir an duh lo caah an nunnak pek ngamh in Malaysia le Indonesia ah phungning lo in an lut hna.

Ni kum April thla zongah president Dutertu nih Myanmar ram ah hrem le tukvelh a tongmi Rohingya ralzaam pawl cu Philippines nih dornak pek kan duh ko hna timi le Europe ram hna zong nih Rohingya kongah i tel ve dingin a rak chim bal cang.

Myanmar nih Rohingya miphun an cihmih a timh tiah Aung San Suu Kyi tinh in a chim i a hnu ah Myanmar ram thil singin ka rak theih dih lo caah ka ngaithiam uh a ti tthan.

Philippines ram ah hin Muslim 4% lawng an um. Khrihfa ram a si.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.