Salai Bawi Lian Mang nih Malaysia Chin Miphun Ni ah a chimmi

‘2019 December ah Chin ralzaam donghter ding’ timi hi UNHCR le ramkip nih ruatṭhan dingin kan in nawl hna.

Aruang cu atu lio kan ram sining zoh tikah, democracy kan ngah rih lo, tlukruannak a um rih lo i biaknak zalennak taktak a um rih lo. Malaysia le India um Chin ralzaam hna nih nanmah zohkhenhnak le umpinak an herh tuk lio a si. — [sawmmi special guests pawl sinah Mirang holh in a chimmi]

Chin Miphun Ni kong (Kawl holh in chimmi)

1928 February 20 ah Chin hruaitu pawl an rak i tong hna. Chin miphun lakah avoi 1nk bik ramkhel party an rak dirh, “Chin Lungrualnak Party” tiin an rak dirh.

Mah lio hi Mirang/British nih a kan uk lio a rak si.

Kum 10 hnu, 1938 ah Kanpetlet khuapi ah Chinmi 2,000 nih “Mirang uknak kan duhlo” tiah buainak tel lo tein zalam cungah duhlonak an rak langhter.

Duhlo-langhternak hruaitu Chinmi 9 cu Mirang nih an tlaih hna.

1948 ah Mirang uknak in kan luat, luatnak kan hmu. Kan pupa hna nih Panglong hnatlaknak minsen an rak thut.

Myanmar rampi (Union of Myanmar) kan dirh cang lai caah Chinmi hna nih zei bantuk uknak phung dah kan hman lai tiin Chin hruaitu hna cu 1948 February 20 ah Falam khuapi ah an rak i tong. Ramukbawi uknak an hlawt i mipi duhning in uknak (democracy) phung an rak i thim.

1957 ah Chin Affairs Council nih ‘February cu Chin mi caah a biapi tukmi thla a si, chokhlei hna an par i Chin ram pumpi aa dawh lio caan zong a si tiin February 20 cu Chin Miphun Ni’ tiah a khiah.

February 20 hi Chin kan pipu hna nih ramukbawi uknak hlawt in mipi duhning in tuknak (democracy) le kan techin fapar hna caah a ttha bik dingin kanmah tein khuakhan lairelnak (self-determination) an rak i thim ni a si.

Mah democracy le self-determination cu atu kan ngah maw? Ngah hlah. Zalong tein Pathian biaknak nawl kan ngei maw? Ngei hlah. A phunphun in khenkham le thlanglamh kan ton caah Malaysia, India le ramkip ah ralzaam kan soknak a si.

UN le ramkip zong nih kum 20 leng chung ralzaam in a kan cohlanmi cungah kan i lawm.

Naite ah UNHCR nih Chin ralzaam ka donghter cang lai a ti caah Chin miphun kan lungrethei tuk.

Zei ruang ti ahcun, atu kan tuahmi Chin Miphun Ni i a hrampi a simi mahte khuakhan lairelnak (self-determination) zong kan ngah rih lo. Mipi duhning in uknak (democracy) zong kan ngah rih lo. Miphun pakhat nih anmah hlawknak lawng ruat in a kan uk peng rih.

Federal phungphai kong an chim, an tlamtlinh rih lo. Mah ruangah Malaysia ah kan phanhnak a si. Ramkip zohkhenhnak kan herh rih.

Kan miphun minung pakhat nih democracy a duh ruangah, self-determination a duh ruangah, a biaknak ruangah harnak a ton ahcun CHRO siseh, Chin party siseh, Khrihfabu hna zong kan i bawmh dih a herh. Kan rian a si.

Mah kan rian cu kan ttuan cuahmah lio a si. UNHCR nih a biakhiahmi ruatṭhan dingin cazin kan tuah. Thailand ah kan kal. UNHCR rianttuan kan ton hna. UNHCR lubik umnak Geneva khua zongah kan kal. London le Australia zong kan kal. Atu zong kan kal lai i kan ton thluahmah rih hna lai. Aa pehtlaimi bu le ramkip ton dingin kan i zuam lio a si.

Mah lio ahhin Chin miphun hna nunzia kan thiam a herh. Kan lung tthawn a herh. Kan tonmi paoh ah teimak khawh kan herh. A hlawhtlingmi miphun paoh khi an lungtthawn caah a si. Kan i tinhmi hmun kan phak khawhnak hnga, biatak tein, ngol lo tein aa zuammi minung, miphun kan si a herh.

Malaysia ah Chin Miphun Ni kan tuah lio ah, kan i zohthla tukmi ‘paih’ kan tuah. Mah lio ahcun Chin miphun nih kan ton bal lomi, zaanglek duhnak lungput ngei loin zohchia khenhru in thil an tuahmi kan hmuh.

Mah bantuk lungput in kan miphun nih democracy, tlukruannak, zalennak kan ngah lai lo.

Chinmi hna nih a huaha lo lungput ngeih dingin Chin Miphun Ni kan tuahmi a si lo. Chin Miphun Ni cu, Pathian nih ram a pekmi, aa dawh tukmi thilthuam le nunphung a pekmi, mahte khuakhan lairelnak kong tiang ruah khawhnak a pekmi miphun kan si timi kha a kan hremtu kan ral pawl le vawleipi kan piah ni a si.

Mah ni ahcun kan lungput a pical a herh. Kan dihlak in pasalttha, nusalttha lungput kan ngeih a herh.

Chin Miphun Ni cu, kan pipu hna nih democracy, mahte khuakhan lairelnak le tlukruannak thlaici a kan tuhpiak ni a si caah mah theipar cu kan zun khawh tiang i zuam cio dingin kan sawm hna. Kan dihlak nuam tein Chin Miphun Ni hmang tti hna usih. Kaa lawm.

Salai Bawi Lian Mang

The Chin Express – Salai Bawi Lian Mang cu Chin Nuhrin Covo Bu (CHRO) hruaitu a si. Chin miphun kong le Kawl cozah nih a kan thlanglamhnak kong cu US, Canada, Europe le UN ah an rak chim lengmang. A rianttuannak in minung a thlengtu le a miphun caah thil ttha a chuahpitu a si tiin Kuala Lumpur Convention Center ah tuahmi World Marketing Summit ah “Leadership and Excellent Award” an rak pek.

University a rak kai lio ah Kawl socialist cozah le ralkap cozah biatak tein a rak dotu lakah aa tel ve. Chin Miphun Ralkap (CNF) ah a lut hmasa bikmi university siangngakchia 7 lakah a rak i tel ve.

Pi Hai Nawn (Tlangrua) le Pu Hniar Chum (Tikir) hna nih Hakha ah an rak ngeihmi fapa a si.

Photo: Lal Mi Sak Sawmhal

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.