Ram thanchonak ah a ummi Chin Miphun 100,000 renglo kan si cang. USA lawng ah Chin Miphun 70,000 hrawng kan um i, Khrihfabu 250 hrawng kan ngei.

“Kum 2020 thawkin Chin ram thachonank ding caah rian tuantu ding Chin Khrihfabu pakhat nih kum khat ah minung pakhat cio kuat khawh i tim usih,” tiah Salai Elaisa Vahnie nih Atlanta, Georgia, February 23, 2019 ah tuahmi 71nak Chin National Day biacah ah a chim.

“Pathian nih thimmi Miphun kan si, kan Miphun ca ah le kan ram serthan dingin fialmi kan si, kan timi cu mah hi rian hi a si ko. Hitiin kan thawk khawh ahcun Kum 2030 ahcun Chin State ah college 10 kan ngeih khawh lai,” tiah a chim fawn.

“Visiting lecturers le professors kum khat ah 50 kan kuat lengmang lai i, kum 2050 ahcun vawlei cungpi nih theihmi min ngeimi Chin University pakhat kan dir khawh lawng siloin, Chin State le Myanmar ram zong a thancho bikmi ASEAN ram hna bantuk kan si ve lai.”

“Chin National Day celebration kan tuah hnawh aruangbik cu: kan zalawnnak fektein kan dirpi than ni a si, kan nungphung, holh le ca, le kan ram kan kilven lai, tiah biakamnak kan tuah than ni a si.”

“Cun, Chin Miphun le Chinram thanchonak ding caah kan ti khawhnak lam cio in ka tel ve lai, ka tuan ve lai, tiah biakam thar kan tuah ni a si,” tiah Salai Elaisa Vahnie nih CND robia bia cah a chim.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.