Indianapolis — US Kawlrammi Zohkhenhnak Bu (BACI) i Executive Director a simi Salai Elaisa Vahnie cu Indiana state Hlutdaw in Senator Jack E. Sandlin nih upatnak roca a pek.

February 12 ahkhan US ah Myanmar Rampi Ni (Union Day) an tuah, mah lio ah a pek.

A rianttuanmi le a mi hruaining theihpinak caah upatnak roca a pek hi si.

“Pu Vahnie cu a phunhawi hna caah biatak tein aa zuam, Kawlrammi hna US ah tlamtling tein khua an sak khawhnak dingah lungthlithum nganpi a ngei, US democracy bantuk hi Myanmar ram ah lenter ve dingin saduhthah a ngei,” tiah Senator Jack nih a chim.

Upatnak roca a pekmi chungah “Pu Vahnie nih Indiana state laicer le US ram pumpi Kawlrammi pawl a bawmh hna ti ka theihpi khawh ve caah kaa lawm, i a cungah ka thinlung dihlak in kaa lawm.

“Pu Vahnie nih rel cawk lo minung pumpak cungah thil ttha a tuah cang i kan khua le kan state a that chinchin nak dingah thil ttha tampi a tuah ti cu al awk a ttha lomi si,” tiah Senator Jack nih a ttial.

“Theihpinak le upatnak roca hi US Kawlrammi hna tthanchonak caah aa zuammi BACI rianttuan vialte, kan sinah aa pumpemi vialte, ruahnak cheutu vialte le a kan bawmtu vialte upatnak roca a si,” tiah Salai Elaisa Vahnie nih a chim.

“2011 ah BACI an dirh thok in, US Kawlrammi hna tthanchonak caah Elaisa Vahnie cu mah zawn ruat lo le thabat hngal loin a ttuan zungzal. Mah roca hi ngah phu hrimhrim asi. Amah cawlcangh ning kan hmuh tikah ahopaoh mi ttha deuh ah kan i chuah dih,” tiah BACI Board member Bonnie Kane nih a chim.

Dr. Ro Ding nih, “Pu Elaisa Vahnie hi mah roca ngahtu dingah aa tlak bikmi a si ko. US Kawlrammi hna bawmhnak caah thil a ti khawh ning, aa pumpek ning le mi a hruai ning nih hin mi vialte khuaruahhar in a kan chiah tawn. BACI Board Chairman pakhat ka dirhmun in, amah he rianttuan tti hi thluachuah co bantukin a si tiin ka ruah i kaa lawm tuk,” tiah a chim.

BACI Kong

Burmese American Community Institute (BACI) cu a miak a kawl lomi bu asi, i Indianapolis um Kawlrammi hna herhhai bawmtu, sianginn kainak le rian ngahnak bawmtu a si. Indianapolis khua lawng si loin state dang ummi, US ram pumpi le ramdang um Kawlrammi tiang rianttuan ttinak in siseh, bawmtu kawlpiak le zapi sin chimrelpiak in siseh, a bawmh peng hna. 2011 ah an dirh thokin, BACI nih minung pumpak 8,000 leng a phunphun in a bawmh cang hna.

The Chin Express nawl loin copy hlah.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.