Sang Hnin Lian: Online thawngpang ruangah i lawm le ngaihchia tuk in um hlah uh

UNHCR nih Chin ralzaam hlawtnak policy cu a zoh tthan lio a si nain, mah policy hi a leet khawhnak ding ahcun Chin state chung thil sining hi ttha tein cazin tuah dih in pek an hau.

UNHCR nih Chin ralzaam hlawt dingin June 13 ah thawng a rak thanh cangka in July 28 tiang, rethei taktak in Chin state ah kum 3 chung a cangmi; ralkap kutneh a tuarmi pawl le Kawlram thil sining vialte kan hlat dih i cazin kan tuah zokzok.

Kan miphun nan caah CHRO nih UNHCR le ramkip cozah sinah harsa ngai in rian kan ttuanmi kong tlawm tein hrawmh kaan duh hna.

2018 November thla zongah UNHCR sinah Chin state boruak kong cazin pe dingin Malaysia ka rak phan i atu bantuk Chin mipi he tonnak zongah ka ra ve nain sau ka tthu manh lo.

UNHCR nih a policy thleng seh tiin September 21 ahkhan Thailand khualipi Bangkok ah ramdang media sin thawngthanhnak kan rak tuah i Chin state boruak kong cazin kan tuahmi cu kan rak chuah.

Mah kan cazin/report cu kan i put i ramkip cozah kan va ton hna. London ah ni 10 kan riak. Australia ah thla 1 chung kan caam. Germany le Switzerland ram hna zongah cozah kan va ton hna i Chin state a ttha thlu rih lo, Chin ralzaam hlaw rih hna hlah uh kan va ti hna. Kan cazin cu kan pek hna.

Mah cazin vialte cu a hmun ah kal in kan va hlat dihmi a si, kan hlatnak ah harnak tampi kan tong. Ngol loin cazin tuah peng rih a hau, thlacamnak in kan bawm ve uh tiah kan nawl hna.

Chinmi chungin, Chin ralzaam pawl Kawlram kirter dingin khua a khangmi hna an um. Malaysia ah umnak nawl ngahter dingin rian a ttuanmi le ram thumnak lanhter dingin aa zuammi zong an um.

UNHCR nih policy a thlen/lo cu kanmah sinah a chim lai lo. Malaysia ah a ummi nan upa hna sin ahhin a chim te ding si.

Cucaah, online ah thawngpang diklo nan hmuhmi ruangah i lawm tuk asiloah ngaihchia tukin um hlah uh ti kan duh hna.

Tahchunak ka chim ahcun, zahan zaan ahkhan Malaysia media The Star nih “Myanmar cozah nih Chin ralzaam kir dingin a cohlan cang hna…” tiin a ttial. A taktak ah Myanmar cozah nih zeihmanh biakamhmi le timhmi a umlo. An duhning paoh in thawngpang an ttial.

Online thawngpang pawl cu i bochan tuk hlah uh. Malaysia i nan hruaitu hna hmurka hi ngai ko uh. UNHCR nih policy a thlen zongah a thlen lo zongah nan hruaitu hna nih an in chimh ko hna lai.

Myanmar ram ah “Go and See” a tuahtu ding pawl cu CHRO in Sang Hnin Lian nih Bangkok ah a ton hna, tiin thawngpang diklo a rak leng. Malaysia ka phanh hnu ah ka theih. A dik lo taktakmi si. Ka tonmi hna cu “Fact Finding Mission” an si.

Atutiang kan rianttuannak ah kan hlawhtling tiah ka ruahmi 2 cu;

(1) UNHCR nih Chin ralzaam hlawtnak thawng a thanh lio ahkhan “ramkip/UN zohkhenhnak kan donghter cang lai” timi biafang a rak telh. CHRO nih upadi a theimi kan sawm hna i Ramkip Upadi le UN Upadi nan buar tiin kan doh hna. Tuni ah UNHCR lutlai kan ton tikah “mah bia kha cu hmang ti hna hlah usih” a kan timi, le

(2) Kan policy cu a si khawh chungin kan zoh tthan lio a si ko a timi hi an si.

Sang Hnin Lian cu CHRO program director a ttuan liomi a si.

Australia Hlutdaw in Senator Dean Smith: September ah Malaysia ka ra tthan lai i UNHCR nih Chin ralzaam hlawtnak policy a zoh tthanmi zei dah lawh ti ka hlat lai – ka hmet law relchap

Theihternak: Australia Hlutdaw in Senator Dean Smith a sawmtu le umkalnak caah a herhmi tangka vialte a khaangtu Pu Reny Ceu Lian Mang le Pastor Ca Lian Thang nih Malaysia Chinmi sinah bia an cahmi March 2 ah rel khawh a si te lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.