Sui Sui chuah nithla a hngalmi cu a IQ sang bakmi nan si

Cuailo par bang aa dawhmi ngaknu Sui Sui cu val kip nih birthday laksawng pek an duh cio. Nang ngai.. mah tluk ngaknu dawh cu aho tlangval nih dah laksawng pek duh lo cun a um hnga i… Sui Sui a chuah thla le ni cu tlangval kip nih an hal.

Theihternak: Mah kanan hi Singapore ram in aa thokmi a si, a kal ning phun dangte a si caah vawleipi a rak cul dih. CNN, BBC, Fox News le adang media tampi nih an rak ttial. A sau cang nain nihin tiang mi tampi nih an tuak kho lo. An min le tuanbia hi Laica in kan thlen i cite kan paih chih – thawngpang chia lawngte rel peng cu, kan thluak ttawl pah usih.

Sui Sui nih a thluak tthami le bochan tlakmi Lai tlangval a duh caah a uar bikmi Pa Lian le Sang Sang cu a hneksak hna. Atanglei ni le thla hi a pek veve hna.

Zei thla le ni hi dah a si hnga?

Nain, a thla te lawng kha a thli tein Pa Lian a chimh. A ni te lawng kha a thli tein Sang Sang a chimh ve.

Pa Lian: Sui Sui chuah ni cu ka hngal kho bak lo, nain a thla cu Sang Sang zong nih a hngal ve lo hrim ti kaa fiang tuk.

Sang Sang: Hmasa cun ka hngal lo nain, Pa Lian na biachim daan bakin ka hngalh colh.

Pa Lian: Si cun ka hngalh ve.

Zeitin dah Pa Lian le Sang Sang nih Sui Sui chuah nithla an hngalh khawh, nang ta na hngal ve maw? Tuak ve hmanh…

Sui Sui chuah nithla a hngalmi cu a IQ sang bakmi nan si lai

Mah kanan tuaknak ding ahcun Pa Lian le Sang Sang nih an chimmi hi a chungril tiang ruah a hau.

Sui Sui nih nithla a pekmi hna zoh tikah ni 14, 15, 16, 17, 18 le 19 an si. 16 le 19 dah lo cu voi 2 aa nolh dih.

Pa Lian nih “Sang Sang zong nih a thla cu a hngal kho lo hrimhrim…” a ti ngammi hi November le December thla an si lo tinak si ti kha Sang Sang nih a hngalh colh.

Sang Sang nih cun a ni kha a hngalh caah a thla lawng tuak a hau. November le December an si lo ti a hngalh cangka in January le February lawng tuak awk a taang cang.

Mah ruangah, “Hmasa cun ka hngal lo nain, Pa Lian na biachim daan bakin ka hngalh colh,” tiah Sang Sang nih a ti colh.

Pa Lian nih zeitin dah Sui Sui chuah ni a hngalh khawh?

Sang Sang bia a theih cangka in, “January le February ahhin amah te lawng simi ni a um hrim” ti kha Pa Lian nih a hngalh colh ve.

January le February cu zoh hmanh; Sang Sang nih a hngalhmi ni kha 14 a si ahcun zei thla dah a si ti a hngal kho lai lo. Aruang cu 14 an um veve.

A thla lawng a hngalmi Pa Lian nih ‘a ni ka hngalh ve’ a timi ruah tikah February 15 a si ti a fiang. January thla ahcun ni 2 a um caah Pa Lian nih a hngalh khawhnak lam umlo.

Sui Sui a sung. An 2 in a vat hna hau men lai, asiloah adang a hneksak tthan hna hau lai…

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.