Surbung tlang airport 40% an lim cang, 2021 ah vanlawng ttumter khawh dingin an sak cuahmah

Falam khua pawng i Surbung tlang ah an sakmi airport cu 40% an lim cang. Kum 2021 ahcun vanlawng ttum kho ve cang dingin an sak cuahmah lio a si tiah kan theih.

Rili in peng 6,000 a sannak hmun ah sakmi Surbung Airport cu vawlei min lo dingin a kam an rual cuahmah lio a si, tiah Lamsul Vuanci Zung in thawng kan theih.

“Surbung Airport cu vanlawng tliknak lam pe 6,000 sau le pe 100 kau in kattaya an phah lai. Tlangpar lei ah Safety Area an tuah lai. Atu hi vawlei min lo dingin hrap khat lei an rual dih cang. Acheu dengmang (40%) an lim cang,” tiah U Kyaw Soe, Aerodrome Standards and Safety hruaitu nih a chim.

“Kum 2021 ahcun vanlawng ttum kho dingin, hman khawh dingin an sak cuahmah lio si,” a ti.

Chin state cu airport a um lo caah motor lawngin tlawn khawh sikaw, furpi lam naal le leimin lio ahcun tlawn a har tuk pinah ni tampi a rau.

Airport a um te tik ahcun fawi deuh in le rang deuh in tlawn khawh a si lai caah ramchung ramleng khualtlawng caah a ttha tuk te lai.

Surbung Airport cu kum 2013 ah planning an suai i 2015 ah sak hram an thok.

Falam khua in meng 8 le cheu a hlatnak Surbung tlang cungah an sak lio a si. An lim tik ahcun ATR 72 (MTOW-49604) vanlawng pawl an ttum kho te lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.