Tangka £600 an bat ruangah seh in hotel a hrawhpiak hna

England ram Liverpool khuapi – A hawile he Travelodge hotel an sa. An dihni ah hlawh tlamtling in an pe lo, £600 an bat caah a thinhung tuk. Vawlei cawhnak seh aa mongh i hotel cu a hrawh viar.

Hotel thlalang kutka cu seh in a khuai dih. Hotel chungah seh aa mongh i minutes 30 chung hrawng a hrawh.

A rian ttuan-hawi tampi nih khuaruahhar taktak in an zoh. Acheu nih an thloh len nain an thloh kho lo.

Zahan zaanlei 3pm hrawng ah a hrawh hi si.

A ttuan-hawi pakhat nih, “kawi, mi nih hlawh an in pek lo ruangah maw mah kha na tuah. Ttuanmi rian cu hrawk hlah ngat,” tiah a auhnawh.

Hotel ground floor a hmeilei vaampang a hrawh dih pinah ceiling zong a hrawh chih dih.

Pawngkam ah a ummi pakhat nih, “Mi vialte an khuaruahhar dih. Mipa cu a molh chuak,” tiah a chim.

“£600 an ka bat a ti. An va bat ko zongah, inn hrawh tiangtiang cu zumh a har ko,” a ti.

Ceiling remhtu Samuel White, kum 24 nih “tuni ah hotel sinah ap cang ding a si. A donghnak bik cuaipia 1 phah i, kan rianttuannak hnawm thianh in hotel ngeitu Travelodge sinah ap cang ding a si,” tiah a chim.

“Mah lio ah, mi molh pakhat nih inn chung alaicer bakah vawlei cawhnak seh a hung mongh i a hrawh dih ko.”

“Nizaan 3pm hlan deuhte ahkhan a si. Minutes 30 chung hrawng bak a hrawh.”

“Rianttuan tampi nih lengin an kaa an i aan i ngong viar in an zoh.”

“Rianttuan a kan hruaitu pa cu alu tanmi ar bantukin aa hel len ko. Aa lawm naisai lo,” a ti.

Pawngkam minung cheukhat nih an thloh len lio ah, social media ahcun mi tampi nih an ttanpi.

“Liverpool khua ah mi vialte an thinhung dih cang. Tu hnu cu liam ding bill liam peng cang uh,” tiah minung pakhat nih Twitter ah a ttial.

“Rian ttuantu a hlawh £600 an pek lo ruangah khua chung um Travelodge a hrawh viar. Rian ttuantu cawisang usih,” tiin a ttial ve.

“Alakua. Atu cu Travelodge an hun deng cang tiah ruat ti hlah,” a ti ve.

Palek nih mipa an kawl

Ahmun ah palek an rung phan nain seh mongpa a zaam cang. An kawl len nain mah ca kan ttial lio tiang ahcun an tlai kho rih lo. — Daily Mail le The Sun UK

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.