Tenaganita: Chin Ralzaam hlawtnak nih 'phungninglo minung phorh' a chuahter khawh

UNHCR nih Malaysia um Chinmi caah ralzaam zohkhenhnak a donghtermi ruangah, Chinmi hna hi phungninglo minung phortu puaisa kut ah an phan kho, tiah minung covo aukanhtu NGO Tenaganita nih a chim.

“Phungninglo in minung a phortu puaisa pawl cu lih le hrokhrawl in minung phorhnak khua an khaang peng,” tiah Tenaganita hruaitu Glorene A. Das nih a chim.

“Cauk le catlap loin Myanmar ram ah na tlung kho ko tiin an rawiphiar khawh hna,” a ti.

August 29 ah COBEM, CHRO le ICC he thawngthanhnak an tuah lio ah atu bantukin a chim hi si.

June 13 ah UNHCR nih ‘Chin ram a him cang caah Chin ralzaam cu an kir kho cang’ tiin thawng a thanh i August 1 in Chin ralzaam hlawt hram a thok thluahmah caah COBEM, CHRO, ICC le Tenaganita nih thawngthanhnak an tuah hi si.

Chin ralzaam hna cu UNHCR card le catlap an thlen tikah 2019 Dec 31 tiang lawng a nungmi card an pek cang hna.

Mah hnu pinlei tiang Malaysia ah an um ahcun UNHCR nih card le catlap a pe ti hna lai lo i a zohkhenh ti hna lai lo, ralzaam an si ti lai lo caah anmah tein an i zohkhenh a hau ding si.

UNHCR card cu Malaysia palek le lahwahkah nih an cohlan piak hna caah a ngeimi cu tlaih le an ram kuat an tong lo.

Thawngthanhnak ah aa telmi Chin hruaitu hna nih, cauk le catlap a ngei lomi Chin ralzaam hna an kir khawhnak ding le Myanmar ram ah him tein an um khawhnak dingah UNHCR nih zeihmanh a bawm hna lo, an ti.

Naite ah a kirmi Chin ralzaam pawl zong a herhmi catlap le cauk an ngeih lo ruangah Myanmar an phak cangka in an tlaih hna, an ti.

Glorene nih, “him tein kirnak lam a um lo ahcun hlawtmi Chin ralzaam pawl nih phungninglo in minung phortu puaisa an fuhpanh hna lai,” a ti.

“Malaysia in Chin state an phak hlan, lampi ah nga tlai ding le rianttuan dingin zuar tong sual hna sehlaw zeitin?”

“An khuaram tiang him le tluang tein an kir khawhnak dingah UNHCR nih ttuanvo a lak awk bak si,” a ti.

Chin hruaitu hna nih, “Chin state hi a him rih lo caah UNHCR nih Chin ralzaam hlawt hram a thokmi hi zohfel tthan seh,” an ti.

“Rammi hna cu an khuasak tintuknak ah khenkham an tong peng, abikin thlanglei Laitlang hoi hna ahcun buainak le hramhram in rian ttuanter a um peng rih,” tiah CHRO programme director Sang Hnin Lian nih a chim.

“UNHCR nih Chin ralzaam pawl card a chuhmi hna hi ngol chung rih seh law, Chin state sining hi mipi sin le Myanmar ram ah hlathlainak tuah seh ti kan duh,” a ti.

Mah kong he pehtlai in, UNHCR Malaysia biachimtu nih “liamcia kum tlawmpal chung ramkhel sining, zatlang sining le mipi himnak kong hlathlainak kan tuahmi zoh tikah Chin state cu a dai in a him ko cang,” tiah a chim.

“Chin hruaitu hna cu UNHCR nih kan ton in bia kan ruah peng ko hna lai. An caah thim awk a ummi pawl kan chimh hna lai i an hmailei kong khua kan khanpi hna lai,” a ti.

July thla tiangah, UNHCR Malaysia cazin ah khumhmi ralzaam le ralzaam a sok liomi (refugees and asylee) minung 159,980 an um.

Mah chungah 30,140 cu Chin ralzaam an si. — The Star

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.

Zeitin na ruah?

Zaangfah na comment ṭial!
Zaangfah tein ka hin a min ṭial