Thaizing ah US, Australia, Denmark le Norway Lai patthawng pawl “Laipaih World Champion” an i cuh cang lai

Vawlei cung ram 4 i Lai patthawng pawl an sawm dih hna, thazing February 9 (Asia February 10) ah US ram, Indianapolis khualipi ah Laipaih World Champion an i cuh cang hna lai.

Laihpaih World Champion i cuhnak cu Chin Miphun Ni lawmhnak caah tiin North America Paih Committee (NAPC) nih 10am-11pm tiang a tuahpiak hna lai.

US patthawng CHS Club members

America ram chung Lai patthang pawl tling khitkhat tein an sawm hna pinah, Australia champion Aa Nawl Khenglawt, Denmark champion Van Ceu Lian le Norway champion Tha Hlei Cung zong an sawm hna. An vanlawng ticket man cu NAPC nih a rin hna.

Laksawng cu atanglei bantukin pek an si lai;

  • Zuamcawh World champion —-$7,000
  • Zuamcawh pahnihnak—-$ 3,000
  • Zatlang bualco—-$2,000
  • Tambik tei —-$1,000
  • Paih dawhbik—-$500
  • Minung pakhat tei—-$20
  • Zuamcawh aa paihmi poh ——$ 50 cio
  • Zuamcawh quater final phanmi—-$200
  • Semi phanmi —-$300

Zuamcawh paih cu minung 16 lawng paih onh a si lai caah min a pemi chungin minthang deuh kha thim an si lai.

Sang Hlei Thang

Ni kum NAPC tuahmi Zatlang paih bualcotu cu Hriphi khuami Sang Hlei Thang a si. Pe 5 le letmah 10 a sang i 220 lbs a rit. Atu lio Lai patthawng hna lak ahcun amah hi a pumrua ttha bik a si lai tiah zumh a si.

Ni kum NAPC Zuamcawh paih World Champion cu Hakha khuami Sui Chan a si. Minung tambik a teitu le paih dawh bik laksawng cu Zophei peng in Mang Bik a si, minung 12 a tei hna.

Sui Chan – 2018 NAPC World Champion

2016 Denmark le Europe chanpion Van Ro Hlawnceu zong aa pai lai, Indianapolis a phan cang.

Hniarlawn patthawng bik a simi Uk Ling Thang zong Indianapolis a phan ve cang. WPC nih tuahmi ni kum Heavyweight Championship ah amah nak ngan deuh Sang Hlei Thang tei in champion a ngahmi, ttihnung taktakmi a si. Tukum zong hi zumh a um ngai.

Thaizing aa phomh ding pawl cu tuzaan 9pm hrawngah khing an thlai hna lai. Khing-thlai lio cu NAPC page ah live an thlah te lai.

Uk Ling Thang: Hmanthlak – CCN
  • Acaan: 10am – 11pm, February 9 (Indianapolis time)
  • Paih tuahnak hmun: Emmerich Manual High School
  • Address: 2405 Madison Ave, Indianapolis, IN 46227 ah a si lai.

Ahmun ah a kal kho lomi zong nih online ah live zoh khawh a si lai. “HD in live kan thlah lai i replay zong aa tel chih lai” tiah NAPC nih a thanh. Online zoh man cu $49.99 a si. Mah hi hmet law zohnak ticket i cawk cia ve.

Malaysia ahcun February 10 zingka 10am a si te lai. Kawlram ram ahcun February 10 zingka 8:30am a si lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.