Kuala Lumpur – Kum 71nak Chin Miphun Ni lawmhnak bawlung puai, CND Cup honnak puai ah Hakha (HPF) le Thantlang (TPF) an chuih i Thantlang nih 2-1 in a tei.

Thantlang hmaikal Ram Hlei Ceu, number 10 nih half time hlan minute 30nak ah a goal.

Thantlang peng fellowship (TPF)

Thantlang tthiam in Siang Hlei, number 77 nih minute 61nak ah a goal ve.

“Ram Hlei Ceu hi Thantlang peng, Lungler khuami a si i Siang Hlei hi Salen khuami a si,” tiah TPF Chairman le ningchim/coach Thawng Lian sin in kan theih.

Cung Bo – angki sen hi Hakha nih an i bochan bakmi le a thiam bakmi si nain tuni cu a goal kho ruam lo.

Hakha hi ni kum CND Cup champion bak an rak si nain, an hmaikal Ezakiel nih Australia ah a kaltak cang hna ruangah maw si hnga, tuni cu an duai rumro. An hmaikal Ceu Hmun nih dawh takin goal 1 a den. Mah pin cu an ti kho bak lo.

Nain, TPF hi ni kum zong an chuihka group level ah teinak nganpi an hmu len nain semi-final ah fak piin an tla. Tu kum zong, champion laksawng RM3,000 le trophy an thlir kho lai ti khawh a si rih hin lo.

Siang Hlei – bawlung aa tlikpi tu angki hring

Puai honni a si ruangah maw si hnga, tuni cu minung an tam taktak. Malaysia ah ram ah Chin Miphun Ni le Chin Miphun Ni bawlung puai kan tuah a donghnak a si kho men cang tiin an rung chuah cio zong si kho men.

Thaizing zong Taman Pudu Ulu celtual ah puai 4 an chuih tthan rih lai. A chuih ding team 8 hna cu;

  1. Dai vs Siyin = 8 – 9:30am
  2. Asho vs Mizo = 9:30 – 11am
  3. Mro Khami vs Matu = 3 – 4:30pm le
  4. Lutuv vs Zo = 4:30 – 6pm hna an si lai.
TPF thanthar pu – CYOM Miss Tha Sui Iang, Lungler khuami

Tutan CND Cup ah team 15 an i tel kho;

  1. Hakha peng fellowship (HPF)
  2. Thantlang peng fellowship (TPF)
  3. Falam
  4. Matu
  5. Zo
  6. LUTUV
  7. Siyin
  8. Khumi
  9. Zotung
  10. Mizo
  11. CEAM
  12. Asho
  13. Mro Khami
  14. Kanpetlet le
  15. Matu hna an si.

2nak laksawng cu RM2,000 a si. A chuihmi team vialte chungah anmah le hmun (position) cio in a thiambik medal pek zong a um te lai.

Chin Miphun Ni cu February 15 ah Chinese Assembly hall ah an tuahte lai. Chin Miphun Ni taktak cu February 20 a si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.