Tial Thang nih ONE Championship ah a zuamtu Cambodia pa hi a tei lai maw?

US Lai patthawng Tial Thang cu Cambodia pa Rin Saroth he Yangon khuapi ah March 8 ah an i phomh lai. Ni 28 te lawng aa duh cang.

US um kum 25 pa Tial Thang @Tial Cung Thang cu Laipaih champion voi tampi a ngahmi le MMA/UFC zongah teinak voi tampi a hmu lengmang cangmi a si. Nain, ONE Championship ahcun tutan hi avoi 1nk bik aa phomh a si lai.

Cambodia pa Rin Saroth zong hi kum 25 bak a si ve. Anih hi 2013 in ONE Championship ah aa phomh lengmang cangmi a si. Voi 110 aa tthua cang i voi 22 teinak a hmu.

US Chinpa Tial Cung Thang "ONE Championship" ah aa phomh ve cang lai
Tial Thang hi World Champion a si te hrim lai ti ka zumh – World Champion Aung La Nsang

‘Limkeng Ke’ Tial Thang cu ONE Championship ah champion 2 bak a ngahmi Aung La Nsang he 365 Hard Knocks ah MMA tthuat a cawng ttimi an si. Aung La Nsang zong nih “Tial Thang cu hiti ning tein aa zuam ahcun ni khatkhat ah world champion a si te hrim lai ti ka zumh” tiah ONE Championship sinah a chim.

Rin Saroth hi TKO zongin teinak a rak hmu balmi si caah daithlang tlukin ngamh sawhsawh men ding a si lo, ttih a nung ngai ve.

Rin Sarith nih technical knockout (TKO) in teinak a hmuh lio video

Nain, Tial Thang nih MMA ah an theih tuk lomi Laipaih in ka tthuat lai a ti.

“MMA kaa thoknak hrampi cu Laipaih in a si! Myanmar ram ah Lethwei le Bando tthuat hi an lar ngai nain tlaih bu tthuat a simi Naban le Laipaih hi mi nih an thei tuk lo. MMA buan chungah Laipaih piah caan a phan cang!,” tiah Tial Thang nih a ti.

Cambodia pa hi Hakha khuathar pa nih Laipaih in a tthuat ahcun a launak ah a ngong kho men. Mah lio ah, Dragon Ke in a chuih chih ahcun puai piat hmanh in a tei khawh men.

Tial Thang nih Laipaih le a ke [Limkeng/Dragon Ke] a hman cang ahcun amah nak ngan deuh Mirangpa Chestnut hmanh fawi tukin a tengh, teng lakin a chuih.

Tial Thang nih Chestnut a tei lio video

World Champion Aung La hmanh nih Tial Thang ke aa bochan cang ahcun ke sawhsawh a si ti lo. Naite i Tial Thang le Chestnut an i phomh lio ah “chuih! chuih chih!” tiin Aung La nih a ti len. Tial Thang nih a tei beh.

Tutan ah hodah na zumh deuh, Lai pasal Tial Thang maw Rin Saroth? Comment …

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.