US cozah an khar (government shutdown) ni 36 hnu, tuni ah President Donald Trump nih “zarh 3 chung cozah zung ka hun tthan lai” tiah thawng a thanh.

“Cozah khar donghter in February 15 tiang zung hun tthan dingin hnatlaknak kan ngei.”

“Harnak a tongmi cozah rianttuan vialte a rannak asiloah a tuanh khawh chung tuan ah hlawh nan ngah dihnak hnga, a rauh hlan ah minsen ka thut lai,” tiah President Trump nih a chim.

President Trump nih Mexico ramri vampang saknak caah tangka $5.7 billion a halmi hna cu Hlutdaw Sang (Senate) chungtel Democratic pawl nih an duh lo ruangah US cozah budget dang vialte zong President Trump nih a min thut duh lo i December 22 in US cozah zung cheu-li cheu-khat cu tangka an ngei ti lo.

December 22 in tangka an ngeih ti lo caah rianttuantu ting 8 (800,000) hrawng harnak an tong.

Ting 8 chungah acheu cu hlawh pek loin ni 36 chung an an ttuan ter cang hna, i acheu cu rianttuan loin inn ah an dinhter hna.

US cozah rianttuan pawl cu zarh 2 dan pengin hlawh chuah hna kaw, government shutdown hnu in voi 2 bak hlawh an chuah ti hna lo caah minung ting 8 hrawng cu harnak an tong taktak.

Hlawh pek loin ttuan termi cheukhat lebang cu rianttuan kalnak ca i motor gas/datsi rawnnak tangka le chuncaw cawknak tangka hmanh an ngei ti lo.

Trump nih “February 15 tiang ka hun tthan lai i mah chungah hlawh pek dih nan si lai…” a ti ko nain, February 15 tiangah Hlutdaw (Congress) nih vampang saknak tangka (budget) an pek lo ahcun cozah khar a si tthan kho men.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.