Tuan Kil: Sui Hingz cu tangka ting thong 4 leng kan hleng hrimhrim lo

By Moe Kyaw (Khonumthung) – Dr Sui Hingz tangka ting thong 4 leng hlen kong he pehtlai in Mizoram state palek nih an tlaihmi Tuan Kil nih, “ka hleng hrimhrim lo” a ti.

Aizawl thonginn ah thlak a tongmi Tuan Kil cu November 12 ahkhan biaceihzung ah a kong an ceih. Mah lio cun Khonumthung nih an ton i bia an hal tikah atu bantukin a chim hi si.

“Dr Sui Hingz nih sual aa ka phawtmi hi a dik hrimhrim lomi si. Amah nih keimah tangka lehlam tampi aa ka hlen. A karh aa ka pek ding le cham ding tlawmpal te aa ka kuatmi khi dahkaw Tuan Kil nih aa ka hlen tiin sual aa ka phawt cu,” tiah Tuan Kil nih a chim.

Yangon khuapi ah a ummi Dr Sui Hingz nih, “Tuan Kil nih tangka ting thong 4 leng aa ka cawimi cham loin India ram ah a zaam…,” tiin a report caah Aizawl palek nih October 24 ahkhan Tuan Kil cu an tlaih.

Nain, Mizoram state cozah nih cun “India ram ah phungninglo (passport le visa lo) in na lut..” tiin taza a cuai, tiah theih a si. Tangka hlen case in taza a cuai/lo balte cu kan thei rih lo.

Dr. Sui Hingz: Mang Nu khuami Tuan Kil nih 400 million kyats a kan hlen
Dr. Sui Hingz le Tuan Kil

Mizoram state ah ka ratnak cu tangka hlen kongah si loin thah an ka timh caah ka zaammi si, tiah Tuan Kil nih a chim.

“Dr. Sui Hingz nih cun CID zong a uk hna. Palek zong a uk hna, misual zong aa ngeih. Keimah zong cu a minung pawl nih kan in thah lai an ka ti.”

“Case tampi in taza kan in cuai lai, thong kan in thlak lai, kan in thah khawh, tiin an ka tlerh ruangah nunnak kawl in Mizoram state ka phak hi si. Mizoram ahcun caan tlawmpal ka him. Myanmar am ah ka kir ahcun ka caah ttihnung tuk,” a ti.

Mah kong he pehtlai in Khonumthung nih Dr Sui Hingz cu phone an chawnh nain an chawn kho lo.

Atutiang ahcun, Tuan Kil cu Mizoram cozah nih Myanmar palek kut ah a ap lai maw ti a fiang rih lo.

Aamahkhan in chuah dingin kan i zuam lio si, tiah Tuan Kil a chungkhat Pu Chantea nih an chim.

“Myanmar ram ah an kuat cun a nunnak caah ttihnung tuk. Mah hi sihni le biaceihtu zong fiang tein kan chimh hna. Atu cu aamahkhan in chuah kan i zuam lio si,” tiah Pu Chantea nih a chim.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.