Turkey ram ah kut le ke in a kalmi minung an um

Turkey ram i khuate pakhat ah kut le ke in a kalmi chungkhar pakhat an um. An dir khawh lo caah ke lawngin an kal kho lo.

“Minung hi liamcia kum ting 40 (4 million years ago) ahcun zawng (ape) kan rak si i kut le ke in kan kal. Khuacaan le pawngkam sining aa thlen ruangah duhsah tein kan i thleng i atu kan dirhmun hi kan phaknak si,” tiah scientists pawl nih an zumh.

Turkey ram i chungkhar pakhat hi liamcia kum ting 40 lio i zawng in minung ah kan i thlen lio ah a tlamtling thlu lomi ci an si ttheo lai, tiah scientists nih an zumh hna.

Muslim nuva hna nih fa 18 an ngeih. 12 cu tlamtling tein an chuak ko nain adang 6 cu liamcia kum ting 40 lio i zawng in minung ah kan rak i thlen lio sining in an chuak.

6 lakah 2 cu pa an si i adang 4 cu nu an si. Pa pakhat cu a dir kho i ke 2 in a kal kho nain zuuri bantukin a kal. Liamcia kum ting 40 lio i minung nih ke 2 in kal kan rak i thokka bantuk a si.

Pa pakhat le nu 4 cu an kheel le ttawk ruh hi zawng (ape) bantukin a um caah an dir kho lo i liamcia kum ting 40 lio i minung kan rak kal ning (zawng kal) in an kal.

Kut le ke in a kalmi unau 5 hna cu kum 18 in 34 kar lawngte an si. Unau 5 hna cu an kut le ke in meng tampi chung an kal kho. An kut zapei vun hi an ke tlukin a chah i a hak.

Minung hi hlan liopi ahcun saram (zawng/ape) kan rak si i ke 2 lawngin kan rak dir kho lo. Ke 2 lawngin kan dir khawh hmasa bik hi liamcia kum ting 40 hrawng ahkhan a rak si men lai, tiah scientists nih an zumh.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.