UK Siangpahrangnu Queen Elizabeth a vapa Prince Philip mawtaw accident a tong

Prince Philip, kum 97 cu nizaan ah mawṭaw accident a tong i aa khawng lo nain, ralrin ah ah sizung ah aa check. “Thinphan pi awktlak in aa khawng lo” tiah Siangpahrang Inn nih thawng a thanh.

UK siangpahrangnu Queen Elizabeth II i a vapa Prince Philip cu Queen Elizabeth Hospital ah sibawi pawl nih an zoh hnu ah ‘thinphan pi awktlak in aa khawnmi um lo an ti’ tiah Siangpahrang Inn rianttuan pawl nih AP thawngla sinah an chim.

Prince Philip cu nizaan kha Land Rover motor in an umnak inn Sandringham Estate pawngah a kal lio ah Kia motor he an i pah caah a motor cu a sir in aa let.

Thil sining a hmutu pa Roy Warne nih “inn ka ttin lio ah motor aa leh lio ka hmuh. A rannak in ka va tli i a chungah bawhte ka hmuh. Mipa pakhat he i bawm in bawhte cu kan chuah,” tiah a chim.

“Prince Philip nih nikaa nih aa ka ceuh caah ttha tein khua ka hmu lo i si… tiin palek a chimhmi hna kan theih,” tiah bawhte a chuahtu minung 2 nih an chim.

“Motor a nakmi cu ka va tlik hnawh ve i a chung ummi ka chuah cu Prince Philip a rak si. Prince Philip cu a tha ther dih, a thawh cangka, a tha ther pah in Kia motor aa citmi minung 3 cu a va zoh colh hna,” tiah a chimchap.

Kia motor a mongtu kum 28 nu cu a khuk tleek. Hnulei ah a tthumi kum 45 nu cu a baan hliah palh. Thla 9 bawhte cu aa khawng lo.

Nu 2 zong cu Queen Elizabeth Hospital ah an thlop hna hnu ah atu cu sizung in an ttin cang.

Norfolk peng palek nih, “voi dang tawn bang motor accident ah aa telmi Prince Philip le adang pawl cu an thaw kan tah hna i zuu an ri lo,” an ti.

“Thil sining cu tling tein kan hlat lai i aa tlakmi upadi in a theipar zunter an si lai,” an ti.

Norfolk peng palek inspector hlun Chris Spnks nih, “aa telmi dihlak ttha tein bia an hal hna lai. Prince Philip zong pakhat hmanh an ttanh lai lo,” tiah a chim ve.

Queen Elizabeth II, kum 92 le a vapa Prince Philip cu Christmas thokin atutiang Sandringham Estate ah an um lio a si. BBC English le Fox News

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.