UNHCR card chuhmi Chin refugee pawl 'ramtang ah an riak'

Malaysia – Cameron Highlands ah rian a ttuanmi Chin ralzaam a zaza hna cu UNHCR nih card a chuh hna ruangah, palek nih a kan tlaih sual lai tiin zaan fatin ramtang ah an riak.

Cameron Highlands um Chin ralzaam pawl cu dum rian kan ttuan hna. Dum ngeitu nih a kan hlanhmi thing inn ah kan um. Inn 1 ah chungkhar 3 le 4 lawngte kan um, tiah Cameron Highlands um Chin ralzaam hruaitu nih a chim.

Nain, Chin ralzaam tampi cu UNHCR nih card a chuh cang hna ruangah inn ah an riak ngam ti lo.

Zaan kan ih kar ah lahwahkah le palek nih an rung kan tlaih lai ti an phan caah, tupi chungah rua in buk an sak i zaan fatin an va riak.

“Buk ahhin, zaan fatin 8pm asiloah 9pm pengah ka ra. Kan umnak hmun ah tlaihkhihnak (oprasi) a um lo zongah, hmun dangah tlaihkhihnak a um paoh ahcun kahin kaa rak thup lengmang,” tiah dum rianttuan Chin ralzaam pa nih a chim.

Cameroon Highlands um Chin ralzaam 3 hna cu tlaihkhih ttih in an i thuhnak tupi chung an buk ah an rak thi. Tupi chung tlang hram i an i thuhnak buk cu October 14 khuadei hlan ahkhan ruahpi sur le leimin nih a nanh caah an rak thi.

Chin ralzaam pakhat nih, “kum 2016 October thla ahkhan ka card a thih caah UNHCR zungah thleng dingin ka kal nain, Myanmar ram a him cang caah kir khawh a si cang an ka ti i an ka thlenpiak duh lo, an ka chuh,” tiah a chim.

“UN card lo cun, kan zawt tikah sizung le sikhaan hna zong nih a kan zoh duh lo. Palek le lahwahkah nih a kan tlaih lai ti kan phang fawn. UN card lo cun rian ngah zong a har tuk,” a ti.

Cameron Highlands i dum ngeitu tampi nih an dum rian cu Chin ralzaam pawl an pek hna.

Chinpa pakhat cu UNHCR nih card a chuh caah hmailei nunnak kong ruat in a lungdong i inn cungin a zuang, a nunnak liam.

Malaysia cozah nih ralzaam a cohlan lo ruangah UNHCR card ngei ralzaam pawl cu phungning tein rianttuan an ngah lo, nain an nunnak caah phungninglo in rian an ttuan. UNHCR card an ngeih lo lebang ahcun rianttuan a har chinchin. Ttuan lo ahcun rawl ei awk ngeih lo pinah, inn man pek awk zong ngei loin hlei tangah rawl loin riah a hau ding an si.

Malaysia MP Charles Santiago

“Ralzaam pawl hi kan ram caah tthatnak a chuahpi tu an si, harnak petu an si lo tiin kan zoh hna a herh,” tiah Klang khua MP Charles Santiago nih a chim.

“Ramdangmi pawl hi anmah le ttuanmi rian cio ah an thiam tuk hna ti hi cohlan piak hna lonak ding aruang pakhat hmanh ka hmu lo,” a ti.

UNHCR Malaysia

Atu lio ahhin, UNHCR cazin ah ralzaam le ralzaam soktu Chinmi 30,000 hrawng an um.

Nain, 2019 kum dongh ahcun hlawt dih nan si lai, tiah UNHCR nih June 13 ah thawng a thanh hna caah lungrethei le bei dong in an um hna.

Chinmi hna cu 2019 Dec 31 hnu cun UNHCR card an ngeih ti lai lo caah, Malaysia ram i an um rih ahcun cozah nih ‘phungninglo ramdangmi’ tuah in a tuah cang hna lai.

UNHCR Malaysia lutlai Richard Towle nih, “Malaysia cozah nih ralzaam pawl hi phungning tein rianttuannak nawl a pek hna ahcun an nunnak tam tuk aa thleng lai,” a ti.

Nain, Malaysia cozah nih ‘ka pek ko hna lai’ timi biafiang pakhat hmanh a chim rih lo. Dr Mahathir le a party PH nih thimnak tuah lai i mipi vote an sawm hna lio ah ‘kanmah na kan vote ahcun ralzaam pawl cu phungning tein rianttuannak nawl kan pek hna lai..’ an rak timi lawng a si. Cozah an tlaihnak thla 6 a si cang nain ‘upadi tamtuk remh a hau eh’ ti pin cu zeihmanh an chim rih lo.

“Ralzaam pawl cu cozah nih phungning tein rianttuannak nawl a pek hna lo caah, UNHCR card in rian an ttuan ahcun upadi an buar.”

“Mah ruang cun, ralzaam pawl hi upadi nih zohkhenh ve hna sehlaw a ttha tuk lai tiin kan ruahnak a si,” tiah UNHCR Malaysia lutlai nih a chim.

Malaysia lahwahkah

“Atu kan cozah thar nih a tuah ding hmuh lai cu kaa ngaih tuk ve,” tiah Lahwahkah upadi bawi Saravana Kumar Marimuthu nih a rak chim.

“Liamcia caan i Najib acozah nih, ralzaam pawl hi rianttuannak nawl pek awk an ttha lai maw ti hneksaknak caah Rohingya ralzaam pawl cu rianttuannak nawl a rak pek hna, atu cu miphun dang pawl zong rianttuannak nawl pek awk an tthat/lo kan zohpiak ve hna lai,” a rak ti.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.