UNHCR: Chin ralzaam pawl cu kir dingin Myanmar cozah nih a cohlan cang hna

  • Myanmar cozah nih Chin ralzaam pawl cu kirnak nawl a pek cang hna

UNHCR nih “Chin ralzaam pawl kirnak kong cu Myanmar cozah nih a theih cang, i kir dingin a cohlan cang hna,” tiah Malaysia media sinah a chim.

“UNHCR nih Chin ralzaam donghter dingin bia khiahmi kan zoh tthanmi kong zong Malaysia cozah he Myanmar cozah he thawng kan thanh hna.

“Chuahkehnak ram i kirnak nawl cu Ramkip Upadi nih a onhmi asi. UNHCR nih Myanmar cozah cu voi tampi kan ton tikah, Myanmar cozah nih ‘Chin miphun hna cu kirnak nawl an ngei ko, i kir dingin kan cohlan ko hna’ an ti.

“Malaysia cozah nih kum tampi chung Chin ralzaam a zohkhenhmi hna cungah UNHCR kan i lawm.

“Chin ralzaam pakhatkhat nih UNHCR zohkhenhnak ka herh rih ko a ti ahcun UNHCR sinah chim seh,” tiah East Asia UNHCR Zung Lubik Bangkok nih a chim.

Chin state a daih cang caah Chin ralzaam pawl cu 2019 December 31 ah hlawt dih an si cang lai, tiah UNHCR nih 2018 June 13 ah thawng a rak thanh.

Atu hi Malaysia UNHCR cazin ah Chin ralzaam 26,000 kan um. UNHCR card/catlap a ngah lomi le chuh cangmi he cun Malaysia ah Chinmi 40,000 hrawng kan um.

India UNHCR cazin ah Chin ralzaam 4,000 hrawng an um ve. Thailand le Nepal zongah Chin ralzaam an um.

Acunglei kongah Chin hruaitu hmurka

Chin Ralzaam Bawmhnak (ACR) chairman Mung Khat nih, “UNHCR nih ni kum June thla ah Chin ralzaam donghternak policy kong thawng a thanh hnu in zei ngaingai thawng a kan thanh ti lo caah, atu bantuk thawngpang an chim ding hi kan i ruahcia bak lo,” tiah a chim.

“Ni kum June thla dongh lai ah UNHCR lutlai pawl he meeting kan ngei nain, mah hnu in meeting zong kan ngei ti lo. Zei thawngpang hmanh kan thei lo, i East Asia level in zei policy dah an thlen ti zong kan hngal lo,” tiah a chimchap.

“UNHCR nih Myanmar cozah vuanci zung kip an ton/lo cu kan hngal lo, nain Zatlang Zohkhenhnak, Bawmhnak le Tthialnak Vuanci Zung an tonmi cu kan hngalh. Mah vuanci zung hi ralzaam kirnak kong, chungkhar cazin le hmatpungttin peknak kong ah nawl a ngei lo. Nawl ngeitu cu Ralkap nih tlaihmi Ramchung Vuanci Zung a si,” tiah CHRO in Sang Hnin Lian nih a chim.

“A kirmi Chin ralzaam pawl cu him tein an um ko lai, cun chungkhar cazin le hmatpungttin zong kan pek dih ko hna lai tiin bia kan kamh uh tiah Myanmar nawlngeitu kan hal len cang hna nain zeihmanh a kan kamh kho lo,” tiah a chimchap – Sang Hnin Lian cu thaizing ah UNHCR tong dingin Malaysia ah a um lio a si.

Falam Ralzaam Bu (FRO) President hlun John Bawi Luai Thang nih, “Chin state, ahlei in Myanmar Ralkap le AA an i kahnak thanglei Chinram hrim cu a him rih lo,” tiah a chim ve.

“Ral a um lio le minung tampi Chin state in an zaam cuahmah rih lio ah, Myanmar cozah le UNHCR nih Chin ralzaam kirter dingin hnatlaknak an ngeih ahcun, a palh taktakmi si.

“Chin state ral an daihter hmasa hnu lawngah a kan kirter awk si, mah lo cun kan kir hnu ah harnak kan tong tthan lai.

“Ni kum December thla zongah Chin hruaitu cheukhat nih anmah pumpak le bu in Myanmar cozah an ton len cang nain, Chin ralzaam pawl kirnak kong a phi an chuah kho lo,” tiah a chimchap.

UNHCR nih Chin ralzaam donghter a timhmi le an kirnak ding kong he pehtlai in Myanmar cozah nih zapi theih in thawng a thanh bal rih lo. Kuala Lumpur um Myanmar Tanzung zong Malaysia media nih bia an hal peng nain zeihmanh a chim duh lo.

Chin ralzaam hruaitu pakhat nih “mah kongah Malaysia Chinmi hna nan lungrethei hlah uh, Myanmar cozah nih cun zeitik hmanh ah Chin state in ralzaam an um ti hmanh a chim duh lai lo, rak kir ko hna seh a ti peng ko lai, kan si khawh chungin UNHCR sinah report pek tu hi a biapi mi si,” tiah The Chin Express sinah a chim.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.