UNHCR: Chinmi caah a phi kan kawl tikah kan tuah ding 3

Malaysia thawngzamhca The Star nih Chin ralzaam kong a ttialmi cu UNHCR nih atanglei bangin a leh.

1. Kan rian a si bang, UNHCR nih ralzaam pawl an ratnak ram hna hi aa thleng deuh cang maw ti cu ngol loin kan zoh peng. Hitin kan zohnak a ruang 2 um;

a) ralzaam-soktu (asylum-seeker) pawl hi ralzaam ah kan cohlang hna lai maw ti hngalhnak caah; le

b) ralzaam (refugee) pawl nih ralzaam zohkhenhnak an herh ti maw, an ram ah him tein an kir kho cang maw ti hngalhnak caah a si.

2. The Star nih ca na ttialmi zoh tikah, ralzaam-soktu pawl cohlan/lo biakhiahnak caah tuahmi RSD interview kha ralzaam pawl nih Ralzaam Zohkhenhnak An Herh Ti Mawi ti hngalhnak caah tuahmi interview thar he na cawhpaih dih.

Ca nan thlah hlan ah, aa dannak kong cu UNHCR nih The Star sinah kan langhter ko nain, ca nan thlahmi chungah aa dannak kong nan langhter lo.

3. Ni kum kha, ralzaam-soktu Chinmi pumpak 16,000 leng cu ralzaam ah kan cohlang hna lai maw tiin RSD interview kan rak tuah hna.

Naite i The Star thawngzamhca nih na ttialmi chungah aa telmi Chinmi pawl lakah, a tam deuh cu ralzaam an si lo, ‘ralzaam’ sinak an tlinh lo caah ralzaam ah cohlan lomi an si.

Ralzaam Dirhmun Biakhiahnak (RSD) interview hi vawlei cung hmun zakip ah UNHCR nih kan tuahmi a si. Ralzaam Zohkhenhnak phungphai ka cohlan tiin minsen a rak thuttu ram pawl zong nih RSD interview hi ralzaam cohlan/lo biakhiahnak caah an hman ve. Malaysia um Chin miphun caah aa dan hleinak umlo.

4. August 2018 thokin, Chin ralzaam (RSD interview a awng cangmi) 15,000 hrawng cu ralzaam zohkhenhnak an herh ti maw ti hngalhnak caah interview kan tuah hna – Thim awk 2;

  • Interview tuah loin 2019 Dec 31 tiang card sauhpiak ding, January 1, 2020 thokin card sauhpiak ti loin ralzaam in hlawt thai ding; le
  • Interview phit ka duh a timi phitter in catlap pek. Thla 2 chungah a sungh/awn chimh, a sungh ahcun UN catlap cu sauhpiak ti loin hlawt beh ding, a awn cun ralzaam card sauhpiak ding, an si.

Mah hi thil thar kan tuahmi, The Star nih RSD interview he na cawhpaihmi cu a si – nihin tiangah UNHCR nih ralzaam a si cangmi ahohmanh card kan chut bal rih hna lo. Interview tuah a duh lomi Chin ralzaam pawl cu 2019 Dec 31 tiang ralzaam an si peng tthiam ko lai.

5. Chinmi hna caah a fekmi a phi kawl dingin UNHCR cu Chin hruaitu bu le anmah a bawmtu bu pawl he naihniam tein rian kan ttuan peng ko lai. A fekmi a phi hna lakah aa telmi cu;

  • Micheu caah ram thumnak kal
  • Adang caah Malaysia um le
  • Kir a duhmi pawl Myanmar ram ah kirnak caanttha hna hi an si

Chinmi hna caah hitin a phi kan kawl tikah, Malaysia cozah tlaitu Mahathir party PH nih election tuah lai ah mipi bia a rak tiam hna bangin Chinmi hna hi Malaysia ah phungning tein caan tawite umnak nawl a pek ko hna lai ti kan i ruahchan.

6. Chin miphun telhin ralzaam vialte hi Malaysia ah phungning tein umnak nawl le rianttuannak nawl an pek hna ahcun, an ngandam deuh lai i sianginn ttha deuh zong an kai kho hrim lai, tiah UNHCR nih kan zumh.

Anmah tein an cawlcang kho deuh lai, i The Star nih na ttial bangin Malaysia harnak lak i khuasak zong an i ziak deuh lai.

Malaysia cozah zong nih ralzaam le ralzaam a si lomi ramdangmi sawhsawh pawl fawi tein a thleidan khawh hna lai. Malaysia ram ca zongah hlawknak a chuak lai i ralzaam ca zongah hlawknak a chuak lai.

Sawmnak: Chinmi caah theihtlei a si tiin na ruah ahcun mi tampi nih an hmuh khawhnak hnga Share ve.

Theihternak: Kan ca hi nangmah nawl in na website ah i copy hlah.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.