India – Tuni ah Delhi um Chin ralzaam 100 leng nih UNHCR zung hmai ah ‘number 2 lakah 1 thimter dingin interview tuah na kan timhmi nithla kan thawn piak’ law ‘Chin ralzaam donghter dingin biakhiahnak na tuahmi hi hrawk’ tiah duhnak an langhter.

Mah kong he pehtlai in New Delhi khuapi um Chin Nuhrin Covo Bu (CHRO) zung tlaitu Salai Cung Dawt cu Khonumthung media nih bia a hal.

“UNHCR Delhi nih Chin ralzaam pawl thim awk 2 lakah 1 paoh i thim dingin interview tuah a kan timh caah lungtlin lonak langhter dingin kan rak i tim bal cang nain, UNHCR rianttuan ning kan hngak. Mah interview cu thaizing December 11 in thok a timh caah tuni ah kan lungtling hrimhrim lo tiin kan langhternak a si,” tiah Salai Cung Dawt nih a chim.

Malaysia um Chin ralzaam paoh cu August 1 thokin UNHCR nih thim awk 2 a pek cang hna;

  1. Ralzaam Dirhmun Biakhiahnak (RSD) interview phit na duh lo ahcun card kan in pek lai i 2019 Dec 31 tiang a nung lai, mah ni thokin ralzaam na si ti lai lo caah UNHCR he zeihmanh pehtlaihnak na ngei ti lai lo. Hlawt na si cang lai.
  2. RSD interview phit na duh ahcun thla 2 chungah na result a chuak lai, na awn lo ahcun ralzaam na si lai lo caah mah ni thokin UNHCR he zeihmanh pehtlaihnak na ngei ti lai lo, ti a si.

“Tutan lungtlin lo langhternak ahhin Chin ralzaam dihlak nih rat an duh cio nain, UNHCR zung hmai a bit tuk caah kanmah hruaitu le upa deuh pawl minung 100 hrawng lawng kan kal,” a ti.

“Ahlei in UNHCR nih Chin ralzaam donghter dingin biakhiahnak a tuahmi kha kan lungtlinglo. Thim awk 2 lakah pakhat paoh i thim dingin interview tuah a kan timhmi zong hi a si kho lo. Hramhram in number 1 a kan thimter bantuk si caah kan lungtling bak lo tiin zung hmai ah kan va langhtermi a si,” a ti.

Chin ralzaam pawl nih an duhnak cu zingka suimilaam 11am hrawng in UNHCR zung hmai ah an langhter hnu ah UNHCR upa pawl nih an auh hna i biaruahnak an ngei.

“UNHCR nih Chin upa pawl a kan auh i bia kan i ruah hna. Kan ttial ciami cathluan pawl kan pek hna. Duhnak kan langhter hnawhchan kan chimh hna. Number 2 lakah pakhat paoh i thim dingin thaizing in interview tuah na kan timhmi hi ni thla kan thawn piak uh kan ti hna nain interview cu thaizing thok ding a si cang ruangah kan thawn kho ti lai lo an ti.”

“India phan Chin ralzaam tampi cu Australia kal dingin visa an hngah lio a si. Mah pawl hi UNHCR nih a si khawh chungin kan bawmh hna lai a kan ti,” tiah Salai Cung Dawt nih a chim.

“Delhi um Chin ralzaam tampi zong nih Australia kalnak an sok cio hna. Interview a phi cangmi i visa a hngak liomi zong an um. Anmah pawl hi zeitin dah nan tuah hna lai, lam phihpiak hrimhrim hna hlah uh tiah UNHCR cu kan chimh.”

“Nan kal khawhnak hnga kan in zuampiak hna lai. A kal ding poah cu kan in kham hna lai lo. Australia kalnak a sok i file number a ngah cangmi pawl cu kan in kham hrimhrim hna lai lo tiah UNHCR nih a kan ti,” tiah a chimchap.

Chin ralzaam pawl nih thim awk 2 lakah zei bantuk an i thim hmanh ah card chut hna hlah uh, an i tlaih liomi card cu a thih tiang tlaihter hna uh tiah Chin upa pawl nih UNHCR Delhi cu an chimh. Geneva UNHCR zung lubik upa pawl he kan i ceih hnu ah thawng kan in thanhte hna lai, tiah UNHCR nih a leh hna. — Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.