UNHCR Malaysia nih Chin ralzaam 6,000 hrawng card a chuh cang hna, tiah ACR Chairman Mung Khat nih a chim.

“Thla fatin Chin ralzaam 100 in 130 hrawng peng tlaih an tong. UNHCR card an ngeih lo ruangah ACR, CRC, tbk. ralzaam bu pawl zong nih kan bawm kho ti hna lo.”

“Lahwahkah thong (camp) ah an kuat hna i cutin Myanmar ram ah an kuat hna. UNHCR card an ngeih lo caah zei ti hmanh in kan bawm kho ti hna lo. Kawlram kuat lawng a taang ko cang,” a ti.

UN Card chuhmi caah hmailei nunnak a pit

UNHCR card chuh a tong vemi Mana Thang te chungkhar hrim cu zoh ah ngaih a chia tuk hringhran. A fanu Esther hi a chuah lio ah a chungril ningcang loin a um caah sibawi nih an hlai i RM28,000 an rak dih.

Nain, mah lio cu UNHCR card an ngeih caah cozah sizung nih acheu a dawt hna i a taangmi RM14,000 cu do cawi pah in an rak cham khawh.

Kum 3 te lawng a simi Esther cu alung a pemmi um rih caah hlai tthan ding a si i RM60,000 hrawng a dih ding si. UNHCR card an ngeih ti lo caah acheu dawt an tong ti lai lo.

“Kawlram ahcun kir ning law zeitin dah ka fanu hi ka thlop khawh lai, Malaysia ahcun ka si khawh chungin kaa zuam lai i ka thlop peng ko lai tiin atutiang Malaysia ah ka um peng,” tiah Pu Mana Thang nih a chim.

Atang video ah tling tein zoh ve

UN card chuhmi Chinpa lungdong in aa that

Maung cu UNHCR card an chuh ve. Kawlram kir ding a ruat kho ti lo, ram thumnak zong a kal kho ding a si ti lo pinah Malaysia tlaihkhihnak lak ah UN card loin thih tiang rianttuan ding a ruah khawh ti lo caah June 29 zingka ah inn dot 6 cungin a zuang in a nunnak aa la.

Maung ruak an humh lio video

UN card chuh a tong Chinmi ahohmanh nih Kawlram kir an ruat kho lo. Micheu cu 2017 ah an rak chuh cang hna, micheu cu 2018 thokka ah an rak chuh hna.

Nain, Kawlram kir ding an ruah khawh lo caah Chinmi 6,000 hrawng cu atutiang Malaysia ah UN card loin an um peng hna. An hmailei nunnak kong khua an ruah ah an lungdong tuk hringhran.

UNHCR card a ngei rihmi Chinmi 30,000 hrawng Malaysia ah kan um. A ngei lomi (chuhmi le UN card a ngah bal lomi he) he cun 50,000 hrawng kan um rih.

Nain, Chin ralzaam sinak cu 2019 Dec 31 ah a dongh lai caah hi vialte Malaysia um Chinmi hi kan riangvaih dih lai ding ruah ah ngaih a chia tuk hringhrang. ‘Minung puicimh kan tong’ ti awk tluk a si.

Chin ralzaam kong cu UNHCR Malaysia lutlai Richard Towle nih zei a rel lomi alo

Richard Towle nih, “ralzaam a chuahtertu thil hi Chin state ah a um ti lo…” a ti. Nain, Chin state ah AA le Kawl Ralkap i kah ruangah Chinmi a thongthongin Mizoram le Chin state chungah an zaammi kong cu pakhat hmanh aa theih ter lo.

“Micheu caah ralzaam kan donghter hi atu lawng si lo. Vietnam ralzaam hoi hna kha Malaysia ah 250,000 hrawng an rak um nain Vietnam ram a tthat hnu cun ralzaam sinak donghter i Vietnam ram ah khirh dih an rak si ko,” tiah Richard Towle nih a chim.

Vietnam ral ruangah a zaammi minung 250,000 hna cu Malaysia rilikam Pulau Bidong camp ah an rak chiah hna i Vietnam ram a tthat hnu ah an rak kuat dih hna, ram thumnak kaltermi zong tampi an rak um.

Vietnam ralzaam chim loin, UNHCR cazin zoh tikah kum 1994 thokin atutiang ah minung 948 lawng hi UNHCR nih ningcang tein a khirhmi an si. Mah hmanh cu Iraq le Seri Lanka deuh lawngte an rak si. Myanmar rammi 10 lawng a rak khirh hna, zei miphun an si ti hngalh a si lo.

UNHCR, Malaysia le Myanmar cozah nih Chin ralzaam kirnak an tuah lo

Chin ralzaam hna phungning te le limhang ngei tein an kir khawhnak dingah UNHCR, Myanmar le Malaysia cozah nih zeihmanh khuakhanmi a um lo caah UN card chuhmi hna cu anmah tein Malaysia ram chungah an vai dih hna.

Chin ralzaam kir khawhnak lam 1 lawnglawng a um – Malaysia cozah nih tlaih viar in lahwahkah thong (camp) ah thlak hnu ah kuat lawnglawng hi si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.