“UNHCR nih Chin ralzaam donghternak policy a thlen cang” timi kong

Malaysia le India um Chin ralzaam pawl 2019 Dec 31 ah hlawt dih ding timi policy cu tuni ah UNHCR nih a thlen cang, tiah Today Mara page nih a ttial.

“2019 December cu Chinmi hna lungfah ni a si ti lai lo.

“2019 ah a card nithla a dihmi pawl kha sauh (renew) khawh a si cang lai.

“Tuni kha Yangon um UNHCR zung ttuanvo ngeitu pawl he tonnak kan ngei i Chin ralzaam donghternak policy cu an thlen cang tiah Dr Sa Sa nih Facebook ah a ttial.

“February 20 cu Chin Miphun Ni zong a si pinah Chin mi hna caah thawngpang ttha kan theih ni zong a si,” tiah Today Mara page nih a ttial.

Mah thawngpang hi biafiang a si cang maw?

Mah thawngpang a tartu Today Mara cu The Chin Express nih “bia dik a si maw?” tiah kan hal hna. “A dikmi si ko. Dr Sa Sa nih Mara Facebook group ah a postmi si” a kan ti i Dr Sa Sa post mi screenshot a kan kuat.

CRC le ACR coordinators zong “mah thawngpang hi a dikmi si maw?” tiah kan hal hna.

“UNHCR nih mah kong zeihmanh a kan chimh rih lo caah a dik/lo ti kan chim kho ve rih lo” tiah a kan leh.

Dr Sa Sa zong Messenger in ca kan kuat nain kan ca a hmu rih lo.

Dr Sa Sa he UNHCR zungah a kal ttimi Khai Aye Zawtha zong kan hal. “Mah kong hi cu mi sin chim rih lo ding bia a si caah kan chim kho rih hna lai lo, zaangfah tein ka ruat thiam ko uh. UNHCR awaan tu hngak rih ko uh,” tiah a kan leh ve.

Thaizing hi UNHCR le Malaysia um Chin ralzaam bu hruaitu pawl meeting an ngei lai. Thawngpang dik a si/lo cu thaizing ah a fiangte lai.

Dr Sa Sa hi Chin ram le miphun caah biatak tein aa zuammi a si. UNHCR nih Chin ralzaam hlawt dingin thawng a rak thanhka zongah Dr Sa Sa nih England ram Hlutdaw chungtel pawl nawlnak ca a rak ttial ter hna. Ramkip ah a si khawh chungin UNHCR biakhiahmi let ter dingin aa zuam zungzal.

Atu thawngpang kong zong ahhin direct in amah hmurka thei kho usih law a fiang colh ding si ko nain zei bang ti awk ttha lo. Thaizing tu hngak cio ko hna usih.

Updated: Tuni UNHCR meeting ah mah kong zeihmanh an chimlo. Cucaah, Dr Sa Sa hi aa palh kho men.

Malaysia um Mara upa cheukhat phone kan chawnh hna. “Dr Sa Sa nih a ttialmi a si taktak ko. Chinmi vialte sinah thawng rak thanh cio hna uh, UNHCR nih Malaysia le India Chin ralzaam donghternak policy a thlen cang, donghter a si lai lo. Chin Miphun Ni thengte ah hi bantuk thawngpang theih cu kaa lawm tuk, tiin a ttial,” an ti.

Dr Sa Sa cu Chin miphun nih bochanmi pasalttha asi, “Chin Person of The Year” rak pekmi zong asi. Miphun le ram caah thil ttha tampi a tuah cang. Chinram mautam in kan paam lio ah UK ram ah bawmh a kan halpiak i facang tampi bawmhnak kan rak hmu.

Chinram khuate tampi ah man loin mizaw thlopnak a tuah. Khua kip in minung 2 cio mizaw zohkhenhning a chimh hna i an khua mizaw zohnak caah sii a pek hna.

A chuahkehnak Lailenpi khua (Mara peng) ah airport a sak cuahmah lio a si. Mara peng hi motor lam a tthat lo caah fur caan i an zawt ahcun Hakha le Thantlang sizung phan manh loin an nunnak a liam lengmang. Dr Sa Sa nih airport a sakmi hi a lim tik ahcun Mara peng Chinmi caah tampi tthatnak a chuahpi lai, minung nunnak tampi a khamh lai.

Atu zong Malaysia le India taang Chin ralzaam caah hi bantukin aa zuam caah upat kan pek i a cungah kan i lawm.

Dr Sa Sa cu Pathian thawngttha chim in Lairam a rak cultu Evan Abe i a fapa a si.

Theihternak: UNHCR nih official in thawng a thanh rih lomi paoh cu “asi taktak rih lo” tiah nan ruahnak lai kan in nawl hna. UNHCR nih official in thawng a thanh lawngah “a si taktak cang” tiin pom ding asi te lai. Mah tikah The Chin Express zong nih kan ttial (update) tthan te lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.