Chin ralzaam pawl nih UNHCR Malaysia ah duhlonak an langhter lio
Chinmi pawl nih UNHCR Malaysia zung hmai ah 'na biachahmi kan cohlang lo' tiin duhlonak an langhter lio - June 29, 2018

YANGON — Malaysia um Chin ralzaam pawl Kawlram ah khirh na timhmi hna hi ngol ko sawh, tiah Yangon um Chin Ralzaam Bawmtu Bu (CRSC) nih UNHCR a nawl.

CRSC nih October 31 ah UNHCR nawlnak cathluan a chuah. UNHCR nih Chin ralzaam donghter dingin thawng na thanhmi nih Malaysia um Chin ralzaam pawl thinphang in a chiah hna. Chin ralzaam ngaknu telh in adang cheukhat zong anmah tein an nunnak an i la, a ti.

“Chin ralzaam hna him tein an kir khawhnak ding ahcun Myanmar cozah nih phungning tein kirnak a tuahpiak hmasa hna zong a herh. Cozah nih kirnak tuahpiak lo buin kir cu an caah a har tuk hringhran,” tiah Salai Isaac Khen, CRSC nih a chim.

“Micheu cu Malaysia ah kum 7 hrawng an um cang caah an kir khawhnak ding ahcun rammi sinak hmatpungttin an sok hau. Cun, sianginn kainak kong zongah harnak an tong lai. Ralzaam sianginn ah an fale an kai. An rung kir ahcun Kawlram ah tang zeizat dah an kai lai,” tiah Isaac Khen nih a ti.

Chin ralzaam hna cu Lahwahkah Upadi in tazacuai an tonnak hnga lo Myanmar cozah zong nih a ngaihthiam hmasa hna a hau. Mah pinah, a kirmi hna khuasak tintuknak caah bawmhnak zong a hau, a ti.

Malaysia ah Chin ralzaam 31,000 hrawng an um. 6,000 hrawng cu ram thumnak ka kalter ko hna lai tiah UNHCR nih bia a kamh hna, tiah Isaac Khen nih a chim.

25,000 paoh cu UNHCR biachahnak nih harnak a pek hna lai tinak a si, a ti.

Chin state cu kirnak caah a dai in a him cang tiah UNHCR nih a ti nain, Paletwa pengah AA le Kawl Ralkap an i kap lengmang rih. An i kah ruang le ramtang i an hmanhmi bomb ruangah khuami hna umnak ngei loin an vai, an hliamh hna, an thah hna, tiah CRSC nih a ttial.

Myanmar ram a himlo ahcun ralzaam pawl cu hramhram in kan kirter hna lai lo, tiah Malaysia Ramdang Vuanci Pu Saifuddin nih October 24 ah a rak chim.

Adang rel awk;

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.