UNHCR nih Chin ralzaam na donghtermi hi zohfel tthan hrimhrim

Malaysia NGO ngan ngai a simi SUARAM nih Chin ralzaam dirkamhnak cathluan a chuah. UNHCR nih 2019 December 31 ah Chin ralzaam donghter dingin biachahnak na tuahmi hi zohfel tthan hrimhrim, a ti.

UNHCR nih Chin Ralzaam A Donghtermi hi Ruahtthan Hrimhrim A Herh

UNHCR nih Malaysia um Chin ralzaam pawl caah ralzaam zohkhenhnak na donghtermi hi SUARAM kan lungrawk tuk hringhran.

Chin ralzaam sinak cu 2019 December 31 ah a dong lai, tiin Malaysia um Chin bu pawl nih SUARAM sinah thawng a kan thanh. Mah kong cu UNHCR nih June 13, 2018 ah thawngthanhnak a tuah. Chin bu pawl nih SUARAM a kan chimh ning ahcun, Chin ralzaam pumpak hna caah ralzaam donghternak cu August 2018 in an thok cang, i ralzaam a si liomi pawl zong 2019 December 31 ah a dong dih lai, ti a si.

Myanmar ramah buainak a um peng rih i Myanmar cozah nih chiakha tukin minug covo a buar peng, i miphun cihmih le timh ciammaam tein mithah hmanh a hmang kho rihmi si caah, Chinmi hna ralzaam sinak chuh cu a caan cu rih lo i Chin ralzaam hna Myanmar ah kir an hauh lai caah Chin state ah harnak zong an ton khawh caah an caah a har tuk hringhran, tiah SUARAM nih kan zumh.

Chin Nuhrin Covo Bu (CHRO) nih hlathlainak a tuahmi nih, tuksapur buainak le minung covo buarnak a um peng rih ti a langhter. Chin khuami hna cu Kawl Ralkap nih thil hrawhpiak, hrem, thlanglamh, duhlo buin tlangrian ttuanter le khuasaktintuknak khenkham an tong peng rih.

Chin ralzaam pawl nih UNHCR Malaysia ah duhlonak an langhter lio
Chinmi pawl nih UNHCR Malaysia zung hmai ah ‘na biachahmi kan cohlang lo’ tiin duhlonak an langhter lio – June 29, 2018

CHRO le naite i UN Biatak-Kawltu Bu nih an chimmi pawl zoh tikah Myanmar ram cu ralzaam hna kirter awk ah a him taktak ko maw ti hi ruah awk a tam ngai. Mah pawl hi ruah tikah, UNHCR nih Chin ralzaam le adang Myanmar ralzaam na zohkhenh liomi hna hlawt cu SUARAM nih kan cohlang lo.

Mah pinah, Chin state ah buainak a um buin UNHCR nih Chin ralzaam donghter cu Ralzaam Mah Lungtho Tein Kirternak UN Phungphai he zong aa kalh. UN phungphai ahcun, ralzaam nih a rak tonmi pawl kha a ram ah pakhat hmanh a um ti lo hnu lawnglawng ah ralzaam sinak chuh khawh a si.

UNHCR nih Chin ralzaam hna caah a hmunmi a phi kawl dingin Chin ralzaam pawl tonbiaruahnak na tuah hmasa lo, kirtermi ralzaam pawl an himnak dingah Myanmar cozah sin in biakamhnak zong pakhat hmanh na la lo, Chin state sining dikthlir zong zeihmanh na langhter lo caah ‘ralzaam kiter tikah a hmunmi a phi kawlpiak ding’ timi UN phungphai na buar rih fawn.

Chin state ah Chin ralzaam kirnak kong hi UNHCR nih Myanmar Tanzung he lawng tonbiaruahnak na tuah i ramchung Chinmi pawl nih an chimmi pakhat hmanh na ngaihpiak hna lo caah UN phungphai na tlinhlo ti cu fiang tukin a lang. Chin ralzaam kirnak caah Myanmar cozah nih program a tuahmi zong a um lo. Mah ruangah Chin ralzaam hna limhang ngei tein le him tein kirnak lam a um lo.

Chin state ah a rak ummi minung covo buarnak pawl kha a um ti lo, cun a kirmi Chin ralzaam pawl caah a herhmi bawmhnak a um lai, tiah mithmuh kuttongh in tehte na langhter khawh hlan paoh cu, UNHCR Malaysia nih ralzaam ah cohlan cangmi chuh tthan ti hi a um awk si lo.

Malaysia um ralzaam pawl hi upadi nih a kilven hna lo caah UNHCR nih card na pekmi hna hi a biapi tuk ti zong SUARAM nih theihter tthan kan in duh. UN phungphai ruangah ralzaam hna thleidan le thlanglamh an ton chinnak hnga lo ruah satmat hnu lawngah ralzaam donghternak cu tuah ding a si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.