Malaysia Chin ralzaam kirnak caah Salai Isaac Khen nih bu a dirhmi kha ACSY

UNHCR nih Yangon um Chin zatlang bu pawl ton dingin a sawm hna caah Chin zatlang bu pawl cu anmah lawng in tonnak an ngei hmasa lai, tiah kan theih.

“UNHCR nih October 27 hrawng ahkhin Yangon um Chin zatlang bu pawl he ton kan duh a kan ti, UNHCR he kan i ton tikah a tlamtlinnak hnga Chin zatlang bu pawl i ton hmasa kan i timhnak si, UNHCR nih zei kong dah ton a kan duh ti cu kan hngal rih lo,” tiah Dai miphun Salai Aung Ling nih a chim.

Chin zatlang bu pawl i tonnak cu Yangon um ဆံုစည္းေအဒင္ခန္းမ ah October 25 ah an tuah lai, Chin miphun ttengnge cio in minung 2 cio an kai lai.

Chin ralzaam kong he pehtlai in, Yangon um pengtlang le miphun ttengnge aiawhtu pawl cu Salai Aung Ling, No Than Kap le Salai Isaac Khen hruainak in 2018 August 4 ah Orchid Hotel ah avoi 1nak meeting an rak tuah.

August 4 an meeting lio ah atanglei bangin media sinah bia an rak chim.

Pu No Than Kap nih, “Chin state ah khuasami ca hmanh ah a har, an kir tikah cozah nih a bawmh hna lo ahcun innlo lo le tangka loin zeitin dah khua an sak lai. Kan lungrethei tuk, Rampi Cozah asiloah Chin state cozah tal nih tangka maw innlo maw, tangka cawih in maw a bawmh hna lo ahcun an har tuk lai,” tiah a chim.

“Malaysia um Chinmi hna kir le kir lo cu kanmah nih biakhiah khawh a si lo. Anmah tein biachahnak tuah a haumi si,” tiah Salai Isaac Khen nih a chim.

Salai Aung Ling nih, “Chin ralzaam kirnak caah cozah nih zeital khuakhan piakmi a ngei hna maw, a ngeih lo ahcun kanmah nih cozah sinah zeital kan hal piak kho hna lai maw, UNHCR hi tah zeital kan chim kho lai maw ti pawl kan ceih,” tiah a chim.

Video ah tling tein…

September thla zongah Yangon um hruaitu cheukhat pawl cu Naypyitaw ah an kal i Chin Hlutdaw palai pawl he tonbiaruahnak le ruahnak halnak an rak ngei.

UNHCR nih “Chin state a him cang caah Chin ralzaam hna cu 2019 Dec 31 in nan kir kho cang..” a ti hna caah Chin zatlang bu, ramkhel bu le siangngakchia bu pawl nih “UNHCR na biachahmi hi zohfel tthan..” tiin cathluan an rak chuah.

Malaysia ram zongah ramkip Chin upa pawl tonbiaruahnak an rak ngei i UNHCR nih na biachahmi zohfel tthan tiin cathluan an rak chuah ve.

Chin Nuhrin Covo Bu (CHRO) zong nih cahmai 30 leng khat in Chin state chung thil sining cu cathluan a chuah i Geneva khua i UNHCR zunglubik ah Chin ralzaam kong cu a va chim.– Chin World

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.