US Chinnu 2 motor in an i pahsual
Hmanthlak: Fiakfairock le WOWT News

US – Kawlrammi 2 cu Nebraska state i Omaha khua ah motor in an i pahsual. Pi Hniang Cia cu zualhma ngai in sizung a phan.

“Pi Hniang Cia, kum 28 cu aa khawnnak a hma fak tuk i a nunnnak caah thinphang si ko,” tiah Omaha hrambunh KMTV thawngzamhca nih a ttial.

“Pi Hniang Cia cu a ke kiak, a ttawk ruh le a liangruh zong a kiak, a chungril zong tampi a rawk. Atu hi Creighton University Medical Center-Bergan Mercy ah an thlop lio si,” tiah Omaha World Herald thawngzamhca nih a ttial.

Pi Hniang Cia cu Thantlang peng, Bungtlang khuami a si i Omaha khua ah a vapa le a fale he khuasami a si, tiah kan theih.

US caan, Nikhatni zingka 5:15am ah Pi Hniang Cia cu motor (Acura TL sedan) aa mongh i rianttuan aa thawh.

“Nitlaklei kal dingin West Maple Lam i aa kuaih lio ah nichuahlei a kalmi motor (Honda Pilot SUV) nih a pahsual, Honda Pilot SUV mongtu cu Tha Ku, kum 30 a si,” tiah WOWT News thawngzamhca nih a ttial.

Tha Ku cu aa khawng lo. Tha Ku hi Karen pa a si, tiah kan theih.

“Motor an i pahnak a ruang bik cu nichuahlei a kalmi motor kha Pi Hniang Cia nih a chuahter hmasa lo ruangah si, tiin palek nih an chim,” tiah Omaha World Herald, KMTV le WOWT News nih an ttial.

Maple Street/Lam cu nichuahlei a kalmi he nitlaklei a kalmi he a pahnih in suimilaam 3 fai an khar hnu, 9:05am ah an hon tthan.

Atutiang ahcun ahohmanh tazacuai an si rih lo.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.