Chinpa hi World Champion a si te lai tiah ka zumh… 

Aung La NSang – Middleweight and Light Heavyweight World Champions of ONE Championship

Kachin pa Aung La Nsang, Once Championship ah champion 2 bak a ngahmi nih, “Chin miphun a simi Tial Thang cu a ra laimi March thla ah One Championship ah avoi khatnak bik aa tthua ve cang lai,” tiah tuni ah a chim.

“Tial Cung Thang @Tial Thang cu keimah nakin a ngakchia deuh, kum 25 lawng a si rih. MMA aa thuatnak a sau ngai cang.”

“Ttuang ah tlaih bu tthuat a thiam ngai. A mi thong le chuih zong a ttha ngai.”

“Amah zong tha pe ve u. A chungkhar he New York ah a ummi si nain Florida state i ka inn ah a rung um i keimah he MMA tthuat kan cinh, rawl kan ei tti.”

“100 ah 100 bak ka zumh. Ni khatkhat ahcun World Champion a si te lai tiah ka zumh. Amah rihzaan tluk hrawng a simi 65.8kg pawl an i tthuatnak Bantamweight ah World Champion a si lai tiah ka zumh.”

“A saya cu ka si lo. A u bantuk ka si. MMA tthuat ka hei chimh pah ve,” tiah Champion Aung La nih a chim.

Tial Cung Thang le Aung La Nsang cu US ram, Florida state ah a ummi Hard Knocks 365 zong ah MMA tthuat an cawng tti.

November 27 ahkhan Tial Cung Thang nih Mirang pa Chestnut cu X GYM Sport Mall ah a tei. Mah hlan zongah UFC ah aa rak phomh tawn i teinak a rak hmu pah lengmang cangmi a si.

Tial Cung Thang cu March 8 ah Yangon um Thuwunna Innchung Buan ah “Reign of Valor” timi tlangtar in asiloah March 31 ah Japan khualipi Tokyo ah “A New Awakening” timi tlangtar in aa phomhte lai.  

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.