Myanmar Fimthiamnak Vuanci Zung palai pawl cu US sianginn ca cawn ning le policy konglam hlat i, cucu Kawlram education system ser tthannak ah hman khawh ve ding ruahchannak he September 20 in October 5 tiah US an tlawng.

Indianapolis khuapi i Kawlrammi 3,000 leng sianginn an kainak Perry Township Schools hruaitu pawl he zong October 2 ah meeting an ngei, tiah kan theih.

An meeting ah an ceihbikmi hna cu;

  1. Perry Township Sianginn pawl ah Chin ca le Kawl ca hi subject pakhat in chimh si ve seh, ti le
  2. Burmese American Community Institute (BSCI) le Perry Township hruaitu pawl i bawm in Kawlram sianginn hruaitu le saya/ma pawl tinttan pek le professional development kong cawnpiaknak tuah kho te usih,” ti hi an si.

Myanmar Fimthiamnak Vuanci Zung (Myanmar Ministry of Education) palai chungin meeting a kai khomi hna cu;

  1. Dr. Myo Kywe, Chairman of National Education Policy Commission (NEPC), MYANMAR
  2. Dr. Sai Kyaw Naing Oo, Director General (Acting), Department of Monitoring and Evaluation (Research), Ministry of Education, Nay Pyi Taw MYANMAR le
  3. Dr. Zaw Myint, Director General, Department of Myanmar Nationalities’ Languages, Ministry of Education, Nay Pyi Taw, MYANMAR hna an si.

US cozah sianginn ah Chin ca le Kawl ca cawn ding kong biaruahnak an ngei

Perry Township Schools lei in District Superintendent Mr. Patrick Mapes, Mrs. Vickie Carpenter, Ms. Whitney Wilkowski, Mr. Robert G Bohannon le Ms. Jane Pollard tiah an dihlak tling tein meeting an kai kho.

Meeting tawlreltu BACI hruaitu Pu Elaisa Vahnie nih, “Indianapolis khua ah a ummi kan fale 3,000 ttha tein sianginn an kai khawhnak dingah a zohkhenhtu Perry Township Schools hruaitu dihlak cungah kan i lawm. Anmah he hi nak kau deuhin rianttuan kho usih ti kan duh,” tiah a chim.

US cozah sianginn ah Chin ca le Kawl ca

“Chin ca le Kawl ca hi Indianapolis khuapi um cozah sianginn pawl ah subject pakhat in cawn si ve seh tiah Indiana state cozah le Perry Township  hruaitu pawl he kan i ruahnak hi kum 3 renglo a si cang. Cucu a theipar a chuah khawhnak hnga tutan ah kan i ruah tthan hna.”

“Cu lawng silo, Kawlram chung le Chin state sianginn pawl ca tiangah rian kan ttuan tti kho ko lai ti kan ruah caah mah kong zong cu kan i ruah fawn hna,” tiah a chimchap.

Myanmar Ministry of Education palai hna cu Universities le Indiana Department of Education hruaitu upa hna he zong an i tong, tiah kan theih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.