US khuasik ruangah minung 20 leng an thi cang

US ram cu chaklei hawhra thli (polar vortex) a hran ruangah tuar khawh lo tiangin a kik, -49 degrees Celsius tiang a phan i minung million tampi lungrethei in an um.

Khuasik ruangah a tlawmbik minung 21 paoh an thi cang, tiah US media pawl nih an ttial.

Kik nih taksa khal lakin a tlaih ruangah tan a haumi an um sual lai, tiah sibaw tampi thinphang in an um.

Chicago – Lake Michigan a tlang

A kih biknak hmun pawl cu US ram chaklei alai in nitlaklei states pawl an si.

Inn-ngeilo le tar pawl ca hrim ahcun tuar khawh ding a si lo. Chicago le khuapi tampi nih cun khua-inn le zatlang zohkhenhnak zungah an auh dih hna.

Hmun cheukhat cu a kih tuk ahhin minutes tlawmpal chungah minung taksa thi lak, khal lakin a tlaih khawh.

O’Hare International Airport ah vanlawng an cancel dih hna. Vanlawng tliknak lam hawhra lawngte a si caah a nal tuk.

Kan sizungah a tlawmbik minung 25 paoh cu kiktlaih zawtnak in an rung phan. A zual deuhmi pawl cu an kutdong le ke-thei tanpiak an haute kho men, tiah John H Stroger Jr Hospital in trauma specialist doctor Poulakidas nih a chim.

Chicago khuapi lawngah khuasik in minung 9 leng an thi. Thli a hrangmi a kih tuk ning mi a ttam.

Niagara Falls ni a chuah hlan

A thimi lakah University of Iowa ah a kai liomi kum 18 pa zong aa tel ve. A sawng pawngah a ruak in an hmuh. Khuasik ruangah a thi a khal i a thi.

Ohio state i Lorain khua ah a ummi inn pakhat chungah kum 60 nu a ruak in an hmuh. A khuasih tuk caah a thi a kal kho ti lo i a rak thi.

Liamcia kum 20 lio zongah hi bantukin chaklei hawhra thli hi US chaklei states pawl ah a rak hrang bal, tiah US Rampi Khuati Zung (NWS) nih a chim.

Lake Michigan

Vawlei alu (North Pole) ah a hrang tawnmi hawhra thli kik taktak kha tanglei ah a hung hran caah atu bantukin US a den hi si.

Khuasik an celh cio lo caah US inn kip le company kip nih inn lumhnak seh (thermostat le heater) dong loin an hun cio hna i an mei le gas man a kai taktak.

Liamcia kum 20 chungah tutan tlukin US rammi nih mei le gas an hmang bal lo. Caan sau nawn aa peh ahcun sehzung ah gas a dih kho, tiah tangka cazin tuaktu company Refinitiv nih a chim.

New York

Detroit khua lebang ahcun ‘natural gas’ kan i za ti lai lo tiin General Motors company nih a sehzung 11 a khar cang. Fiat Chrysler Automobiles NV zong nih a sehzung 2 ah rianttuan a tthumh (a sawh).

Mawttaw lam cungah hawhra lawngte a si caah lam a nal tuk i atu le tu mawttaw an i pah hna.

Iowa’s Johnson County lebang ahcun nizaan suimilaam 2 chung te ah mawttaw voi 26 an i pah manh.

Chicago

Chicago khua i Great Lake a cung-phavuan zong a khal dih. Tiva tampi an khal dih. Reuters, Fox News, New York Times

A kihnak hmun ah a ummi US Laimi pawl, a herh tuk lo ahcun kik lak leng chuah i sum hna usih. Hmanthlak duh ah minutes tlawmpal te leng na chuah ruangah na kutdong le ke-thei a khal ahcun tan a hau kho.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.