Muslim chungin US MP hmasa bik a si vemi nu Ilhan Omar nih ‘US nih Israel nan bawmhmi hi Israel-ttenhtu bu nih tangka in an in cheh hna caah si’ a ti.

Hlutdaw Niam democratic MP hruaitu pawl nih “a rannak in mipi sinah ngaihthiam hal” an ti colh.

Muslim nu hi Somalia ram ah a chuak, an ram muslim ralhrang ruangah harnak a ton caah dawtnak tein US nih ralzaam in a lakmi a si. Naite November thla i US Hlutdaw Palai (MP) Thimnak ah Minnesota state Democratic party in teinak a hmumi a si.

“Judahmi-huatnak hi a um taktak ko, Judah ttanhawi le ka rianttuan hawi hna nih Judahmi tuarnak kong nan ka chimh caah kaa lawm. Ka aiawhmi Minnesota state le US um Judahmi dihlak kan timi hna a si hrimhrim lo,” tiah ngaihthiam halnak ca a tarmi chungah a ttial.

Hlutdaw Niam lutlai nu Nancy Pelosi (democratic) le Hlutdaw Niam democratic MP hruaitu Stency Hoyer nih “bia fak na chimmi kong ahhin a rannak in ngaihthiam hal hna” an ti hnu ah muslim MP nu nih ngaihthiam halnak ca a tar hi si.

MP (member of parliament) = congressperson in US

“A dik ning tein Israel soisel cu US le Israel upadi nih a onhmi zalong tein chimrelnak nawl a si. Nain, MP Omar nih Israel ttenhtu pawl judahmi huatnak bia le nehsawhnak bia in a timi hna hi cu mi fahsak awktlak taktak a si,” tiah Hlutdaw Niam lutlai le MP tamdeuh hruaitu nih cathluan an chuah.

Republican party chungtel pawl lebang nih cun muslim nu MP 2; Omar le Michigan state MP Rashida Tlaib cu liamcia caan ah Israel an doh tuk ruangah ‘huatnak mei an kau’ tiin taza kan cuai hna lai, an rak ti bal cang.

Muslim nu MP pahnih cu Israel cozah an soisel tuk ruangah kan hnu thla ahkhan mi nih taza an rak cuai bal cang hna. Nain, zei hraw an tong lo. MP Rashida Tlaib cu Israel a hua taktakmi Palestine nuva nih US ah an hrinmi a si.

Zarhpini zaan ah thawngla pakhat nih Twitter in Republican MP hruaitu Kevin McCarthy cu “Omar le Tlaib nih phun dang in Israel an hmuh ruangah an kaa phih na duh hna” a ti.

Mah cu MP Omar nih a hmuh ve i “Benjamins ruangah a si ko hen cu” tiin a comment. Benjamins a timi hi US dollar 100 caah a cuangmi khi a chim duhmi si. Tangka ruangah a si ko hen cu a ti duhnak si.

Mah cangka in Israel thawngla pakhat nih “Omar, American ramkheltu pawl nih Israel an ttenhnak dingah aho nih dah tangka a pek hna tiah na ruah?” tiin a rak hal colh ve.

“AIPAC” tiah Omar nih a leh. AIPAC cu American Israel Mipi Bawmtu Bu a si.

AIPAC nih kum fatin a tuahmi puai le Israel tlawnnak a tuahmi ahhin Democratic he Republican he a sawm hna i an telpi tawn hna. Nain, thimnak i cuhnak caah AIPAC nih tangka a pe bal hna lo.

Omar nih ngaihthiam halnak ca a tarmi chungah “muslim ka si ruangah mi nih an ka doh lio zongah, ka bia a ngaimi an um ve ko lai ti ruahchannak ka ngei ko nain, mi nih a kan chimhmi hi ruah tthan ta lengmang a herh. Mah ruangah lungtak tein ngaihtham kan hal hna hi si.

“Nain, AIPAC a si ah, Meithal Duh Bu (NRA) le zinan company pawl zong nih ramkhel an hrawh tuk ti cu biadik bak a si. Caan sau tuk an tuah cang caah mah kong hi kan ceih hrimhrim a herh,” ti zong aa tel.

Democratic party in Hlutdaw niam upadi bu chairman Jerrold Nadler zong nih, “Omar nih Israel le Judahmi huatnak kong a ttial ningte hi cu siarem lo taktak le lungrawk taktak a si. Hlan lio ‘Judahmi le tangka’ huatnak biachia ah pei a va kir tthan hi” a ti ve.

US Hlutdaw ah muslim an rak um bal lo. November thla Hlutdaw Palai Thimnak ah democratic party in muslim nu 2 nih Minnesota le Michigan state in teinak an hmuh caah anmah 2 hi avoi 1nk bik US Hlutdaw chungah lutuam he muslim an um asi. Fox News, The Guardian le AFP

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.