US ram a kih tuk caah sianginn tampi an khar cang

Atu hi US ram cu a kik taktak, a ttam bakin a ttam hna. Chicago khuapi hrim cu -23 a phan cang. -56 tiang a phan te kho men, tiah scientist nih an zumh.

US ram nitlak-chaklei state tampi cu inn leng chuah ngam zong a si lo. Inn chung hmanh ah lumhnakseh (thermostat/heater) hman lo cun an tha a therh dih hna.

Chinmi tampi an umnak Indianpolis khua zong a kik taktak cang. -17 a phan cang.

Madison khua lebang cu -28 a phan cang.

Wisconsin state hrim cu hawhra latmah 15 a chah. ‘Poipang kan tong (state of emergency)’ tiah state cozah nih thawng a thanh i cozah thazaang dihlak in a bultawl cuahmah.

Chicago khua lebang cu kum 1994 in tutan hi a kik bik si.

Hawhra letmah 6 tiang a chahnak khua tampi a um cang. Vanlawng tliknak lam zong hawhra lawngte si i a nal tuk caah vanlawng thong tampi an cancel hna.

Acunglei kan langhtermi khua hna lawng si loin US ram pumpi in a kik dih. Ahlei in, US ram chaklei alai in nitlaklei state pawl hrim cu a kih a zual khun. Khua cheukhat ahcun -30 leng a phaknak zong a um len cang.

Atu hi US cu khuasik caan (winter season) a si caah a kih caan a si ko nain, hi tluk tiang fak in a kik bal theng lo.

Liamcia kum 25 chungah tutan hi a kik bik si lai, tiah Indiana hrambunh media Fox59 nih a chim.

Lam tampi cu hawhra nih a khuh dih i a nal tuk caah mawttaw tampi an i pah cang hna. Tiva hme paoh cu an khal pah dih cang.

US sianginn, company, biakinn le mucu, tbk., tampi an khar thluahmah cang hna.

Zei ruang dah mah tlukin a kih?

Vawlei cungah a kih biknak hi vawlei alu ‘north pole’ a si. Minung zong an um kho lo, ti khal (ice) lawngte a si. Khuasik caan i mahka hmun ah thli a hrangmi cu hawhra he aa cawh dih.

Mahka hmun ah a hrang tawnmi hawhra thli asiloah chaklei thli kik (polar vortex) cu kum fatin khuasik caan paoh ah tanglei ah a hung hran caah Canada le US a hung tthuat tawn.

A thli a kih tuk ahhin mi a ttam bakin a ttam pinah, hawhra a hung phorh chih caah a kik khun.

Tutan ah hi tluk fakin chaklei thli kik a hung hrannak aruang cu khuati aa thlen (climate change) ruang zongah a si pah lai, tiah scientists nih an zumh.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.