Vawlei cung Chinmi vialte nih UNHCR le Malaysia cozah nawlnak ca kua cio usih – mah hi hmet ve

Malaysia rammi 1,500 leng nih UNHCR le Malaysia cozah nawlnak ca a kan kuat piak cang. Klang peng MP Charles zong nih a kan kuat piak. Vawlei cung Chinmi vialte zong nih nawlnak ca kua ve hna usih. Atanglei ah nawlnak ca kuat ning kan ttial.

Kan theih cang bangin Malaysia le India um Chinmi 30,000 leng cu UNHCR nih 2019 dongh ah hlawt dih dingin bia a khiah cang i card zong 2019 Dec 31 tiang lawng a nungmi a pek thluahmah cang hna.

Hi vialte Chinmi hi 2020 ah harnak faktuk an tong lai. Kawlram ah inn le hmun zong an ngei ti hna lo. An fale pawl Kawlca zeihmanh an thiam ti lo caah sianginn zong an kai kho ti lai lo. Paw cawmnak rian zong an ngei lai lo. Khuaci an mui lai.

Malaysia media nganbik a simi The Star nih Chin ralzaam caah UNHCR le Malaysia cozah nawlnak website chinup.my a kan tuahpiak i an rammi 1,500 leng nih nawlnak ca an kuat cang.

Ca kuat cu a dihlak in UNHCR Malaysia lutlai Thomas, UNHCR headquarters Geneva, Malaysia Ramchung le Ramleng Vuanci Zung ah pek dih a si lai.

Nawlnak ca cu nangmah tein ttial a hau lo. The Star media nih an ttial ciami a um, na min le email lawng ttial a hau.

The Star media nih nawlnak ca an an ttial ciami chungah aa telmi cu;

  1. Zaangfah tein Chin ralzaam donghter hi leet.
  2. Zaangfah tein Chin ralzaam le ralzaam soktu hna hi Malaysia ah an um khawhnak hnga phungphai tuahpiak hna. Ahlei in Malaysia ah saupi a um cangmi pawl caah, ti le
  3. Zaangfah tein Chinmi hna hi Malaysia ah rianttuannak nawl, sianginn kainak nawl le man fawi tein cozah sizung ah i thlopnak nawl pe hna, ti zong aa tel.

Nawlnak ca kuat ning;

  1. Mah hi hmet law nawlnak website ah an kalpi lai
  2. Na min le na email na ttial hnu ah atang bik i a sen in aa kulhmi na hmeh lai. Mah lawng cu si.

Chinmi tampi nih an hmuhnak hnga le nawlnak ca an kuat cio nak hnga Facebook ah share kan bawm ve.

Theihternak: Website cattial pawl nih copy kan siang lo. Atu kan ttialmi (kanmah website) ta direct share lawng kan sian. Nangmah website ah copy/paste hlah.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.