Malaysia Chinmi kir bawmh dingin Yangon Chin upa pawl rak au rih hlah u

Malaysia le India um Chin ralzaam hna nih Myanmar ram kir an duh ahcun Vice President Henry Van Thio  khuakhannak in kan bawmh hna lai, nain Kawlram ah upadi a rak buarmi caah cun a har ko, tiah Pastor Naing Thang, All Chin Society – Yangon (ACSY) secretary nih a chim.

“Myanmar ram ah kir a duhmi nih kanmah sinah bawmh a kan hal ahcun, Yangon airport ah lahwahkah nih biahal in tlaih an tonnak hnga lo le an khua tiang him tein an phak khawhnak hnga kan bawmh hna lai. Vice President Henry Van Thio he zong kan ceih cangmi a si,” tiah Pu Naing Thang nih a chim.

“Vice President zong cu Chin state le Chin miphun caah ttuanvo a ngei ve. Mah ruang cun, khua kan khanpiak uh tiin kanmah ACSY hi a kan fialnak si.”

“Myanmar ram ah upadi a rak buarmi pawl caah cun kir a har ko. Zeihmanh upadi a rak buar lomi caah cun kir khawh a si ko lai,” a ti.

Chin ralzaam kong he pehtlai in, November 3 ahkhan ACSY upa pawl le Vice President Henry Van Thio meeting an rak tuah. Mah lio cun, Chin ralzaam kirnak kong hi ACSY nih ttuanvo la uh ti ka duh tiah Vice President nih a rak chimh hna, ACSY zong nih cozah he i bawm in ttuan an duhnak kong an chimh ve i hnatlaknak an rak ngei.

Chin ralzaam pawl Yangon airport an phak tikah siseh, an khua ah phak an duh ah siseh, hmatpungttin le chungkhar cazin tuah an duh ah siseh, bawmh a kan halmi paoh cu cozah he i bawm in kan tuahpiak hna lai, an ti.

Atu lio ahhin, UNHCR Malaysia cazin ah Chin ralzaam 30,000 hrawng kan um. UNHCR India cazin ah 5,000 hrawng an um ve.

Acunglei vialte hi ACSY secretary Pu Naing Thang nih Kawl media Akonthi sinah a chimmi si.

The Chin Express kherhlainak/analysis

Acunglei ah Pu Naing Thang nih a chimmi vialte ttha tein ruah dih tikah; Chin ralzaam kirnak kan bawmh hna lai an timi hi zei pipa a si lo. Kan bawmh hna lai an timi cu Malaysia Chinmi tampi nih an herh leem lomi;

  1. airport i lahwahkah counter ah tlaih an tonnak hnga lo bawmh le
  2. hmatpungttin le chungkhar cazin tuahpiak i him tein khua tiang tlunter lawng a si. Upadi a rak buarmi cu kan bawm kho hna lai lo, an ti fawn.

Mah bantuk bawmh hi Malaysia um Chinmi nih an herh taktakmi a si lo.

Hmatpungttin, chungkhar cazin le passport tuah kongah Malaysia Chinmi ahohmanh an lungrethei lo.

Malaysia Chinmi nih an phan taktakmi cu zei dah a si?

Khua phanh hnu i umnak inn le khuasaknak kong a si. Malaysia ah kum 5 in kum 20 karlak a um cangmi lawngte an si. Cheukhat cu an family ningin Malaysia an ra. Laitlang an innlo an zuar dih cang.

Tlun ahcun inn an ngeih lo pinah, inn hmun zong an ngei lo. Kan tlun cun zei tangka in dah inn hmun kan cawk lai? Zei tangka in dah inn kan sak lai? Zei tangka in dah kan fale sianginn kan kaiter hna lai? Zei dah kan ei lai? Kan tlunka kum 2 chung zeitin dah tangka kan kawl lai? ti hi an phan bikmi a si.

Mah vialte cu minung 50,000 leng nan bawm kho taktak hna lai maw? Nan bawmh khawh ttung hna lo ahcun dai tein rak um rih uh, tiah kan in nawl hna.

Atu lio ahhin, UNHCR Malaysia cazin ah Chin ralzaam 30,000 hrawng kan um. UNHCR cazin ah aa tel lomi he cun 50,000 dengmang hrawng kan um. UNHCR India cazin ah 5,000 hrawng an um ve.

Tlun a duhmi cu atu zong an tlung peng ko.

Kir rih lo dingin UN le ramdang cozah kip an nawr hna lio a si.

Mah ruangah Malaysia Chinmi tampi nih UNHCR zung hmai tiangah duhlonak an rak langhtermi kha a si.

Mah lio ah, zei pipa a tthahnem lomi kir bawmh dingin nan au peng ahcun minung 50,000 leng harnak nan pek khawh hna.

A si khawh ahcun, inn hmun, inn le an tlunka pawcawmnak kong zeitin dah kan bawmh hna lai ti hna kha dai tein rak ruat chung rih ulaw a ttha deuh lai. A herh ahcun kum 2020 pinlei i lam a pih dih cikcek hnu ah nan bawmhte hna lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.