Myanmar ram i Vice President [2] Pu Henry Van Thio cu ‘2018 Chin Person of the year’ ah Yangon hrambunh All Chin Society Yangon (ACSY) nih an thim.

Chin zatlang bu 19 (Chin miphun ttengnge 53 huapmi) nih dirhmi All Chin Society Yangon nih Chin person of the year cu avoi khatnak bik a thim a si i ram le miphun caah thilttha a tuah khotu kha biapi ah zoh in a thimmi a si.

“Chin person of the year kan thim tikah hmun 3 in kan zoh.”

“Pakhatnak ah Chin miphun a si lai. Pahnihnak ah Chin miphun caah thilttha a tuah khotu le Pathumnak ah Chin miphun lawng siloin Myanmar ram pumpi ah a ummi tlangcungmi caah santlaimi tiin kan zoh.”

“Cutikah, Vice President Pu Henry Van Thio nih a tlinhbik caah amah hi Chin person of the year ah kan thimnak a si,” tiah All Chin Society – Yangon Vice President U Hung Saw nih a chim.

Chin Person of The Year laksawng cu ACSY tawlrelnak in tuahtimhmi Yangon Chin Miphun Ni ah an pek te lai.

All Chin Society – Yangon Bu nih February 18-20 tiang khi Yangon khuapi ah Chin Miphun Ni a tuah lai.

Chin Miphun Ni ahcun Vice President Pu Henry Van Thio telhin Chin miphun chungin 5D le 6D a hmutu siangngakchia, Ph.D (Secular & Religion) a hmutu, Myanmar ram aiawh in zaanglek aa zuammi, hlasa minthang, Miss le Mister ti pawl laksawng peknak zong an tuah lai. _ Khonumthung

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.