World Bank rianttuan pawl nih Chin state cozah an rung ton

Kalay-Falam-Hakha lampi serremh le nylon kattaya phahnak kong he pehtlai in World Bank Myanmar Country Management Team rianttuan Pu Martin Fodor le a mitthi pawl nih tu zingka ah Chin state cozah an rung ton.

Chin lamsul vuanci Pu Sui Thio nih, “mah lam hi rianrang tein tuah hna seh ti kan duh, anmah zong nih design an lim rih lo, lamsul umtu ning le pawngkam sining, zeitin dah rian kan ttuan lai ti pawl an hlat lio si, mah dih cun rian kan thokte lai tiah an rung kan chimhmi si,” a ti.

Kalay-Falam-Hakha lampi serremhnak rian cu 2019 October thla ah kan thok lai an rak ti nain tutan ah a rami World Bank rianttuan pawl kan hal hna tikah a kan let kho lo, tiah Pu Sui Thio nih a chim.

World Bank nih Myanmar rampi cozah cu US dollar 200 million cawih a timh, mah chungin $66.8 million cu Kalay-Falam-Hakha lampi nylon kattaya phahnak caah Chin state cozah cawih ding a si.

Kalay-Falam-Hakha lampi serremhnak caah lam kauh a haumi cu Sakremhnak Vuanci Zung nih ttuanvo a lak i kum 2016 in a rak kauh thluahmah.

Nain, lam a kauhnak hmun pawl ah pawngkam ummi dum le innlo a hrawh hna tiin World Bank nih $66.8 million cawih tthan lo ding phun in a rak chim nain Chin state cozah he an rak i tong i a tluang tthan.

World Bank nih a fial bangin Chin state cozah nih lam kauhnak hmun pawl cu a zohfel tthan i hmunhma hrawhpiak a tongmi pawl cu tangka 200 million kyats leng a rak liamh hna.

World Bank rianttuan pawl cu Hakha khuapi um Chin zatlang bu pawl he zong tonbiaruahnak an ngei i Kalay-Falam-Hakha lampi aa lim tikah zeitin dah zohfel a si lai ti pawl an ceih tti hna. — Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.