Yangon ah CNF ralkap 2 an tlaih hna

Nan ralkap 2 kan tlaih hna, tiin Myanmar Rampi President Zung nih Chin National Front (CNF) sin ah thawng a kan thanh, tiah CNF hruaitu cheukhat nih zahan ah an chim.

CNF ralkap a simi Salai Naing Tun le Aung Yan Lin hna cu Chin state, Mindat khua in Kachin state, Laiza peng i Mungsaiyan khuate ah an kal i KIO/A sinah ralkap tinttan an rak kai.

KIA sin in basic military training an lim hnu ah, cadet training a kai rih ding an si nain an duh ti lo caah Kachin state khualipi Myitkyina in Yangon ah an zaam.

CNF nu ralkap Mai Ca Bor
CNF nu ralkap Mai Ca Bor

October 22 ahkhan, palek nih an i tthumhnak Yangon ramtthen, Dagon peng ah an rung tlaih hna.

North Dagon palek sakhan nih Phungninglo Bu Upadi Dal 17 (1) in October 23 ahkhan case a tuahpiak hna.

Mah upadi hi a tlawmbik kum 2 in a tambik kum 3 tiang thongthlak pinah tangka liamter khawhnak upadi a si.

CNF nu ralkap a si
CNF nu ralkap

KIO cu Ram Pumpi Kahngol Hnatlaknak (NCA) ah minsen a thut lomi si caah cozah nih ‘phungninglo bu’ a ti.

Mah kong he pehtlai in, Rampi President Zung nih October 23 ahkhan CNF sinah thawng a thanh.

CNF cu 2015 October 15 ah NCA minsen a thutmi a si.

Dr. Lian Hmung Sakhong uniform aa hruk lio
Dr. Lian Hmung Sakhong uniform aa hruk lio

Tlaih tong CNF ralkap 2 kong he pehtlai in, CNF Vice Chairman Dr. Salai Lian Hmung Sakhong nih, “an tlaihmi hna hi CNF minung an si tak/lo kan check ta lai, atu ahcun bia chim awk a um rih lo,” a ti.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.