Zawngtah A Tthatnak

Zawngtah ei a tthatnak hi a theimi mi tlawmte an si. Zawngtah cu khuasik caan ah a tlaimi a si. Laitlang ahcun zawngtah a zat caan ah Kalay le Falam in India lei hna ah an zuar. A duhmi an tam ngai.

Zawngtah i scientific min cu Parkia Speciosa a si. Petai ti zong in mi tampi nih an auh. Petai cu Malaysia holh a si. Bitter Bean, Stink Bean, Twisted Cluster Bean ti zong in an auh.

Zawngtah cu Myanmar, India, Thailand, Malaysia, Lao, Combodia, Vietnam, Tuluk, America le Europe ram hna nih an ei bik.

Zawngtah cu meh ah kan ei. Laitlang ahcun zawngtah cu mei ah kan rawh i a mu kan lak/ a hawng kan ziah i tisa ah kan tlah hnu ah ngapih/hmanphak he kan cawh i kan ei. Cheukhat nih zawngtah cu voksa, kingkuar, buanthur tbt he an kio.

Thiamsang pawl nih zawngtah ahhin a tlum dat phun 3 a um an ti. Thingthei ah a ummmi a tlum dat, glucose le fu ah aa telmi a tlum dat hna an si.

Zawngtah cu kan ei i kan pum chung a phak tikah kan thinlung a hlimh-hlauter, kan umkhua a nuamhter ti a si.

Zawngtah ahhin potassium dat a um ruangah nifatin ei khawh ahcun thluak a tthatter, thinlung a zanter ti a si.

Cholesterol a tlawm pinah a thlum dat tlawmte lawng a um ruangah thi-kai, zun-thlum, thi-thlum zawtnak ngeimi nih eipiak ah a ttha ti a si.

Fibre a tam i chung a nemter. Dula zawtnak chuak lo dingin a kham khawh.

Culawng siloin, naupawi lio mi nih an herh ngaimi thir dat tampi aa tel pin ah luakchuah zong a kham ti a si. Naupawi liomi nih eipiak ah a ttha ti a si.

Fikfa nih an seh tikah zawngtah mu naa thuh ahcun a thakmi le a fakmi a damter lai.

Zawngtah ahhin vitamin B6 aa tel i thi-thlum zawtnak a kilven. Zawngtah kan ei tikah kan thisen chung ah a ummi Hemoglobin timi thisen a chuahter caah thi tlawmmi nih eipiak ah a ttha.

Zawngtah hi a tthat lonak a um ve. Zawngtah cu a rim/haw chiami a si ruangah ei hnu ni 2, 3 zong ah zun, ek le ka a nam.

Zawngtah chung ah aa telmi carbohydrate dat ruangah hmin tein chuan lo ahcun pawpurhnak a si.

Protein dat a tam tuk ruangah kal caah a ttha tuk lo. Nain, Potassium a tam i Cholesterol a tlawm ruangah kal ah lung a um lo nak hnga a kilve khawh ve.

Zawngtah ei nak nih taksa a zen lo nakhnga 40% a kilven tiah New England Journal of Medicine nih a ti.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.